Октябрь 13-те Кызылда Улусчу чогаадылга төвүнге республиканың Адалар чөвүлелиниң 10 дугаар юбилейлиг чыыжы болуп эрткен. Аңаа Тываның Чазак кежигүннери, Дээди Хуралдың депутаттары, яамы-ведомстволар болгаш хөй-ниити организациялардан төлээлер, республиканың билдингир эр кижилери болгаш үлегерлиг адалары шупту чыглып киришкен.
Байырлыг хуралга ТР-ниң Чазак Даргазының Хүндүлел бижии, өөрүп четтириишкин бижиктери болгаш өске-даа шаңналдарны шылгарааннарга тывыскан.
Чыылганнарга ол хүн Тываның хөйге билдингир хөгжүмчүлери, артистери солун концертти бараалгаткан. Ол ышкаш сценаже оглу, ачазы, кырган-ачазы – үш салгал үнүп келгеш, эң улуунга хүндүткелдиң ёзулалын кылганы көрүштүг болгаш залга олурган аныяктарга, келир үениң адаларынга дыка-ла өөредиглиг болган. Индирже сөс ап үнген илеткелчилер шупту Тываның келир үеде адаларынга ёзулуг эр соруун чидирбейн, өгбелериниң чагыг-сөзүн хүндүлеп, езу-чаңчылдарын сагып чоруурун күзээн.
Болган юбилейлиг хуралга хамаарыштыр Чазак Баштыңы Владислав Ховалыг бодунуң блогунга мынчаар демдеглээн:
“Тыва Республиканың Адалар чөвүлелиниң юбилейлиг 10 дугаар чыыжының киржикчилеринге үре-түңнелдиг ажылдаарын күзедим! Чурттуң Президентизиниң чарлыы езугаар Адалар хүнүн демдеглээрин күрүне деңнелдиг айтып каан. Ынчангаш чылдың-на октябрьның үш дугаар улуг-хүнүнде демдеглеп турар.
Силерниң хөй-ниити идепкейжи туружуңар өг-бүле үнелелдерин быжыглаарынче, элээди оолдарны Төрээн чурттунга ынак, патриотчу болгаш бедик харыысалгалыг кылдыр кижизидеринче угланган. Кандыг-даа нарын айтырыгларны шиитпирлээрде, эрге-чагырга, эрге-хоойлу органнары болгаш хөй-ниити-биле демнежип алгаш, шиитпирлеп болурун база билир силер. Чөвүлелдиң лидерлери кончуг күштүг, шынап-ла, хөйнү мөөңнептер платформаны тургузуп шыдапкан.
Чонувустуң ызыгуурдан дамчып келген ёзу-чаңчылдарын, сагыш-сеткилдиң мөзү-бүдүштүг болурунуң үнелелдерин хөгжүдеринге киириштирген улуг үлүг-хууңар, кылып турар ажылыңар дээш өөрүп четтиргеним илередип тур мен”.
Бистиң корр.
Буян ООРЖАКТЫҢ тырттырган чуруктары.
«Шын» №78 2023 чылдың октябрь 14