Декабрь 9-та Тыва үндезин культура төвүнге Алтай Республикадан келген “Эре-Чуй” ансамбли боттарының оюн-көргүзүүн бараалгаткан. Төөгүден бээр эп-найыралдыг чурттап чораан төрел чоннар – тываларның болгаш алтайларның культуразы бот-боттарындан улуг ылгал чок дээрзи келген аалчыларның ыр-шоорундан дыңналып турган.
Шагда-ла тургустунган ийи культураның быжыг көвүрүү ол хүн улам делгем апарып, өгбелерден дамчып келген ёзу-чаңчылдарын, культуразын, хөөмей-сыгыдын бараалгадып, тоолчургу маадырларын алгап, ырлап келген алтай хөгжүмчүлер чыылганнарның сагыш-сеткилин доюлдурупкан.
Оюн-көргүзүгнүң баштайгы минутазындан эгелээш сураглыг алтай чурукчу Аржан Ютеевтиң чураан чуруунда “Өгбелерниң кыйгызының” демдээ болган кыс уругнуң дүрзүзү ол кежээге ханы утканы киирген.
ТР-ниң культура сайыдының дузалакчызы Сайын Дойур баштайгы сөстү ап, алтай аалчыларга байыр чедиргеш, Тываның Культура яамызының мурнундан өөрүп четтириишкин бижиктерин тывыскан.
ТР-ниң Профэвилелдер федерациязының даргазы, Тываның улустуң артизи Галина Сюрюн келген артистерни «ёзулуг патриоттар» деп адаан. Ол ышкаш чурукчу Аржан Ютеевтиң болгаш Александра Пирлейниң чедиишкинин онзагайлап демдеглээн.
Ол кежээ дургу хөөмей-сыгыттың хуулгаазын күжү көрүкчүлерге бичии-даа алаагар чай бербээн. Ооң кадында тыва, алтай дылдарның дөмейлешкээ артистерниң чүнү ырлажып турарының утказы очулга чокка-ла көрүкчүге билдингир болган.
Александра Пирлейниң фортепианога оюну биле алтай улустуң национал хөгжүм херекселинге ойнаан көргүзүүн көрүкчүлер дыка сонуургаан. Ылаңгыя тыва дылда Александра Маратовнаның бижээни ырызын «Сорук кирген изиг чүрээң согуушкуну хөлзедип тур...» деп алтай артистерниң ырлап күүсеткени дыка-ла чараш болган.
Шак ол хүн болган найыралдың онза кежээзи “Тыва” биле “Эре-Чуй” ансамбльдарның каттышкан «Аа шу декей оо» деп ырдан эгелээн көргүзүү бүдүн залды хөме апкан. Көрүкчүлер шупту туруп келгеш, деңге ырлажып, үргүлчүлелдиг изиг адыш часкаашкыннары-биле үдээн.
Медээни болгаш чурукту Тыва үндезин культура төвүнден алган.
“Шын” №49 2025 чылдың декабрь 18