Сөөлгү чылдарда эскерип чоруурга, тыва чонувус Россияның кайы-даа булуңнарында кандыг-даа ажылдарны кылып, албан-даа черлеринде ажылдап чоруурлар. Чамдык ажыл-агыйлыг-даа кижилер шалыңы эки боорга, соңгаар бөдүүн ажылдарга, чайгы шөлээ үезинде ажылдапкаш, чанып кээп база турар. Чамдык аныяк оолдарывыс ТШО чоруп турарлары база бар.
Амыдыралынга берге материалдыг байдалдар тургустунуп кээрге, соңгаар ажылдап чоруп турары билдингир болгай. Олар төрээн Тыва чуртун сактып, тыва чонунуң ат-алдарын сыкпайн, харын-даа хей-аъдын бедидип, алдаржыдып чоруурлары бар.
Бир видеороликтиг материалда «Дагларым» деп ырының үделгези-биле соңгаарда балыктап турар тыва оолдар, уругларны көргүстү. Ону көргеш, тываларымны кээргеп-даа, муңгарап-даа, кижиниң ыглаксаазы-даа кээр. Амыдырал-чуртталга дээш дыка-ла кызымак тывалар-дыр. Далайның эриинде элезинде «Тыва» деп суг бижип каанын бодаарга, чуртунга ынаан, бердингенин, сактып турарын көргүзүп турары ол. Ажыл соонда чурттап турар бажыңнарынга келгеш, быжырган далганын, боорзаан кылып чип турарлар. Тывалар дыка-ла кызымак, бергелерге торулбас, ажыл-ишчи чон деп чүвениң бадыткалы бо-ла-дыр.
/ Сергей ОЮН.
“Шын” №3 2026 чылдың январь 29