Улуг-Хем кожуунда “Оргаадай” көдээ ажыл-агый бүдүрүлгези республикада сайзыралче чүткүлдүг ажыл-агыйларның бирээзи. Бүдүрүлге ажыл-ижин улам калбартып, тараа шөлдерин улгаттырып, бо чылын сайзыралче элээн херии, дидим-дидим бурунгаар базымнарны кылган.
Кожуун чагыргазының даргазының бирги оралакчызы Уран Серин биле көдээ ажыл-агый эргелелиниң даргазы Болат Ховалыг бүдүрүлгениң ажыл-агыйын сонуургап четкен.
“Оргаадай” бүдүрүлгезинге Волгоград хоорайдан “Фавор” фирманың инженерлери Андрей Левков, Константин Нерад база “ПромСибУрал” компанияның инженери Роман Черешнев 3 хонук дургузунда улуг станоктарны эптээш, бүдүрүлгениң ажылчыннарын ол станоктарга ажылдаарын өөреткен. Арбайны болбаазырадып, оон каржаңын дээш, далган аймаан кылырын, хлеб быжырар далганны хоюдур дээрбелээри, ол ышкаш гречканы аштап-арыглаар станоктарга ажылдаарын “оргаадайжылар” өөренип алганнар. Олар станоктар дузазы-биле бир шак дургузунда 150–200 кг далганны бүдүрүптер аргалыг апарган. Далганны тускай станоктар баш удур тургузуп каан программа ёзугаар кыска үе дургузунда белени-биле хаптаптар апарган.
Чүгле арбайдан 8–10 хире аңгы далган аймаа үнүп кээр. Кырлыг-карадан ортопедтиг сыртыктар, матрастар бүдүрүп болурун, ол ышкаш огород, садтарга чемишчидилге дээрзин инженер Роман Черешнев сонуургадып тайылбырлаан. Тываның байлаа хөй, ону болбаазырадып сайзырадыр болза, чедиишкинниг болур дээрзин сургакчылап келген инженерлер демдеглээн.
“Оргаадайның” удуртукчузу ышкаш, шалыпкын-кежээ, бурунгаар чүткүлдүг болуп, бай-байлак оран-таңдының кежиинден салдынмайн, кат-чимис, эът-сүт болбаазырадыр цехтерни сайзырадып болурун кожуун чагыргазы медеглээн.
— Станоктарны эптеп, аңаа ажылдаарын өөренип алдывыс. Улаштыр чогуур документ-саавыыр ажылдары бүде бээрге, продукциявысты үндүр садып-саарар, четчелеттине чарар ажылдар база эгелээр. Продукцияны бүдүрүп алгаш, улаштыр саарылгаже үндүрбес болза, ажыл хөнүвейн баар болгай – деп, “Оргаадай” бүдүрүлгезиниң удуртукчузу Эрес Мандан-оол чугаалап турар.
Көдээ ажыл-агый адырынга шак мындыг бүдүрүлге ажылын калбартып, Тывага аъш-чем аймаан хөйнү бүдүрүп эгелээринге кожууннуң чурттакчылары чоргаарланып турар. Улуг садыг-саарылганы чорударынга болгаш сайзырадырынга үлүүн киирип, “оргаадайжыларның” бүдүрген аъш-чемин садып алырынче республиканың чурттакчы чонун улуг-хемчилер кыйгырып турар.
Улуг-Хем кожуун чагыргазының медээлеринден А. ДОНГАК белеткээн.
Чуруктарны интернеттен алган.
"Шын" №53, 2023 чылдың июль 19