Чазак Даргазының Дээди Хуралга Айыткалында регионнуң социал-экономиктиг айтырыгларын шиитпирлээринге эртемденнерни хаара тудар, оларны киириштирер дугайында демдеглээн турган.
Россияның Эртем фондузунуң болгаш Тываның Чазааның деткимчези-биле чарлаттынган турган мөөрейниң түңнелинде, 5 төлевилел шилиттинген. Ооң ниити акшаландырыышкыны 13 млн рубль. Тыва талазындан үндүрер акшаландырыышкын эртемни сайзырадыр талазы-биле регионалдыг күрүне программазында көрдүнген.
Төлевилелдер Тываның экология, экономика адырларының, тыва дылды сайзырадыр, инновациялыг өскерилгениң чугула айтырыгларын эртем талазы-биле шиитпирлээринче угланыр. Ооң бир чижээнге Мурнуу Сибирьниң девискээринде амгы үениң этноэкономиктиг чорудулгаларны, ол ышкаш Тываның девискээринде хемнер, суглар, бойдус байлактарының байдалын тодарадыр мониторинг ажылдарны чорудары болур.
