Тыва Республиканың Чазааның 2020 чылдың март 23-те үнген 105 дугаарлыг доктаалы ёзугаар орулгазы эвээш болгаш хөй ажы-төлдүг өг-бүле бүрүзү 2,145 тонна хөмүр-дашты база 4,8 куб метр оттулар ыяшты күрүнеден халас алыр.
«Социал хөмүр-даш» губернатор төлевилелиниң боттаныышкыны Тывада уламчылап турар. Бо чылын 3887 өг-бүле оттулар чүүл деткимчезин ап турар. Төлевилелдиң кол-ла сорулгазы– одалга сезонунда даңзыда кирген чонну одаар чүүл-биле хандырары.
Орулгазы эвээш болгаш хөй ажы-төлдүг өг-бүлелерге тускай шериг операциязының киржикчилериниң өг-бүлелери база немешкен. Ынчангаш бо 2025-2026 одалга сезонунда ук төлевилелдиң деткимчезин алыр хамаатыларның саны баштайгы чылдардан элээн көвүдээн.
Күрүнениң деткимчезин алыры-биле баш бурунгаар даңзыже ады кирген хамаатылар 2025 чылдың декабрь айның сөөлгү ажыл хүнүнге чедир одаар чүүлдү алган турар ужурлуг.
Эрзин кожууннуң чагырга даргазының амыдырал-хандырылга талазы-биле оралакчызы Рэнчиндорж Шойжулчаптың дыңнатканы-биле алырга, Эрзин кожуунда «Социал хөмүр» төлевилели боттанып турар. 2025-2026 одалга сезонунда ниитизи-биле 118 өг-бүле күрүне деткимчезин алыр даңзыже кирген. Оларның 52-зи ТШО киржикчизиниң өг-бүлези, 66-зы хөй ажы-төлдүг болгаш орулгазы эвээш өг-бүлелер. Бо хүнге чедир ТШО киржикчилериниң 51 өг-бүлезинге хөмүрнү чедирип дүжүрүп берген. Чаңгыс өг-бүле арткан. Хөй ажы-төлдүг болгаш орулгазы эвээш 66 өг-бүлениң 52-зи одаар чүүлдү алган. Ам 16 өг-бүлеге чедирери арткан.
Айдың ОНДАР.
Чурукту интернет четкизинден хоолгалаан.
“Шын” №49 2025 чылдың декабрь 18