Хар-назыным улгадып, 80 хар чоокшулаан кижиниң баар оруум эмнелге апарды. 75 харга чедир ажылдап чорааш, ындыг-ла кончуг аарывайн турдум. 2021 чылдың сентябрь айда коронавирустан аарааш, ол-ла хевээр эмнелгеден ыравастадым. Делегейге нептерээн хамчыктыг коронавирустан хөй-ле кижилер чок болду. Тываны база ол оюп эртпээн, дыка хөй эки кижилеривисти чидирдивис. Хамчык-биле улуг демиселге тыва медицина кончуг-даа туруштуг бүгү-ле хемчеглерни ап келди.
Чурттап турар адрезим аайы-биле найысылалдың Гагарин кудумчузунда 1 дугаар поликлиникаже эмчилеп турар мен. Ленин кудумчузунда терапия салбыры турган бажыңны хоорай поликлиниказының бир оран-савазы кылдыр эде кылганы аарыг кижилерге эптиг байдалды тургускан. Участок эмчилериниң кабинеттерин таарыштыр кылганынга кижи бүрүзү сеткили ханып эмчилеп кээр апарган. Ылаңгыя ооң 2-ги каъдында хүндүскү стационарны ажытканынга дыка өөрүп турар бис. Ооң иштин кончуг арыг-силиг орун-дөжек болгаш техника-биле дерээн. Ол өрээлдиң кол ээлери – ак халаттыг, эвилең-ээлдек эмчи сестралары. Олар хүнде 40–50 хире аарыг кижилерге бараан болуп, сыкыртып, капельницалар салып эмнеп турарлар. Бо кайгамчык коллективте аңгы-аңгы тускай эртемниг эмчилерниң, эмчи сестраларының база санитаркаларның эп-найыралдыг ажылдап турарын эскердим.
Май 12 — эмчи сестраларының хүнүн таварыштыр ак халаттыг эмчилеримге байыр чедирбишаан, оларның аттарын маңаа демдеглекседим: хүндүскү стационарның эргелекчизи Улана Мөңгүн-ооловна Бурунчап, хирург эмчи Шеңне Владимировна Бюрбю, улуг эмчи сестразы Октябрина Александровна Тюлюш, хирург эмчиниң сестразы Чочагай Кызыл-ооловна Дамчат, невролог эмчи Саяна Сарыг-ооловна Куулар, терапевт эмчи Соруктуг Александрович Ондар, терапевт эмчиниң сестразы Алена Александровна Девек, санитарка Олча Эдуардовна Анай-оол дээш өскелер-даа. Ылаңгыя сөөлгү 5 чыл дургузунда эвилең-ээлдек эмчилерим Октябрина Александровнаның, Чочагай Кызыл-ооловнаның база Шеңне Владимировнаның буянын көрүп, эмнээшкинни ап келдим. Профессионал байырлалыңар-биле, эмчилерим!
| Светлана ДАНЗЫН-ООЛ,
Тыва Республиканың алдарлыг журнализи.
"Шын" №34 2023 чылдың май 13