Тываныӊ күрүне университединге «Евразия» деп национал культуралар фестивалы болган.
Чаӊгыс күрүнеде бир демниг болгаш эп-найыралдыг амыдырап чурттап турар национал чоннарныӊ культураларын бараалгадып көргүзер сорулгалыг «Евразия» деп фестивальга университеттиӊ шупту факультеттериниӊ, Кызылдыӊ башкы институдунуӊ, Кызылдыӊ башкы колледжиниӊ студентилери киришкен.
Онза солун фестивальды Россия Федерациязыныӊ болгаш Тываныӊ күрүне тугун киискидери, күрүнениӊ ыдык ыры-биле эгелээн.
«Бо фестивальга кымныӊ тиилеп үнери кол эвес. Чаӊгыс эп-сеткил-биле кады болурувус эӊ кол чүүл ол. Бистиӊ күжүвүс — чаӊгыс демниг болурунда» — деп, ТывКУ-нуӊ ректору Ольга Хомушку фестивальды ажыдып тура чугаалаан.
Студентилер Россияныӊ чоннарыныӊ культуразын, национал идик-хевин, уран чүүлүн, аъш-чемин, видеоматериалдарны бараалгадып көргүзеринге үр үеде белеткенген. Чон бүрүзүнүң ажыл-амыдыралын, культуразын ханызы-биле өөренип шинчилеп турганнар. Национал костюмнарны боттары белеткээн.
Бойдус-география факультедин калмык чоннуӊ Джангар деп маадыр дугайында төөгүлүг чугаазын шиижидип ойнаан. Аныяк ава дун оглун бодараткан соонда, чок апаар. Өскүс арткан чаш төлдү лама башкы камгалап алыр. Угаангыр болгаш күш-шыдалдыг эр болуп өзүп келир. Калмык чонну эвилелдеп каттыштырган Джангар деп улуг полководчунуӊ төөгүзүн көрүкчүлерге бараалгатан.
Кызылдыӊ башкы институдунуӊ студентилери армян чоннуӊ — Цахкзард, ТывКУ-нуӊ төөгү факультеди — татар улустуӊ Навруз, физика-математика факультеди — чуваш улустуӊ Акатуй, информастыг технологиялар факультеди — марий чоннуӊ Семык, көдээ ажыл-агый факультеди — алтай улустуӊ Эл-ойын, спорт болгаш күш-культура факультеди якут чоннуӊ байырлалын көргүскен. Чечен, калмык, алтай, якут болгаш өске-даа чоннарныӊ ырларын күүсеткен. Чамдык студентилер чоннарныӊ бурунгу шажыны — хам чүдүлгезин ойнап көргүскен.
Университеттиӊ филология факультединиӊ студентилери «Узун назынныӊ талисманы» деп тоолчургу чугааны шиижидип ойнаан. Кижиниӊ хар-назыныныӊ саны азы аас-кежиктиг үезиниӊ саны кол бе?» деп ханы уткалыг айтырыг-биле оюн көргүзүүн төндүрген. Киржикчилериниӊ хөйү болгаш чаӊгыс демниг чоруун «Евразия» фестивалынга бадыткааны дээш жюрилер бирги черни филология факультединге тывыскан.
ТывКУ-нуӊ парлалга албаныныӊ медээлеринден Р. Демчик белеткээн.
