Тываның сугларынга биче хемелерниң эжиндириишкин сезону ажыттынып турар. Россияның ОБЯ-ның Тыва Республика талазы-биле кол эргелелиниң начальнигиниң оралакчызы Валерий Шыырап республиканың Чазаанга Аппарат хуралынга ооң дугайында дыңнаткан. Навигация сезону ноябрь 1-ге чедир уламчылаар.
Амгы үеде Россияның ОБЯ-ның Тыва Республика талазы-биле эргелелдиң биче хемелер талазы-биле күрүне инспекциязының ажылдакчылары БСКИ-де бүрүткеттинген биче судноларның хыналдазын чорудуп турар. Регионда сугже үндүреринге белен 2900 ажыг хемелер, оларның аразында моторлуг хемелер болгаш янзы-бүрү эштир чүүлдер бүрүткеттинген.
Эжиндириишкин сезонун ажыдар мурнунда, майның 13-те, биче хемелер талазы-биле күрүне инспекциязынга хамааржыр хемелерниң беленин республиканың суг объектилеринге хынаан. Ол суднолар суг объектилеринге биче хемелерни ажыглаарының дүрүмнерин хажытпазынче угланган хайгаарал болгаш рейдилер чорударынга ажыглаттынып турар. Суг объектилеринге айыыл чок чорукту хандырар дээш дүрүмнерни сагыырының чугулазын специалистер онзалап демдеглээн.
ОБЯ-ның ТР талазы-биле эргелелиниң медээзинден.
Чурукту интернет четкизинден хоолгалаан.
«Шын» №18 2025 чылдың май 15