Кызылдыӊ чурттакчызы автомашинаны эзирик башкарып чорааны дээш шииттирген.
Күрүнениӊ талазындан буруудадыкчы – Кызыл хоорайныӊ прокуратуразы тус черниӊ 33 харлыг чурттакчызынга хамаарыштыр кеземче херээн чүүлдүг деп санаан. Чүге дизе ол РФ-тиӊ Кеземче дүрүмүнүӊ 264.1-ги чүүлүнүӊ 1-ги кезээнде көрдүнген кем-херекке, тодаргайлаарга, автотранспортту эзирик башкарып чорааны дээш буруудадып турар.
Аныяк оол ооӊ мурнунда автомашинаны эзирик башкарып чорааны дээш административтиг харыысалгага онаажып турган. Ынчалза-даа бо таварылгадан чолаачы кижи бодунга чогумчалыг түӊнел кылбаан. 2023 чылдыӊ февраль айда арага ишкениниӊ соонда, ол база катап автомобильди башкарып чораан дээрзи суд хуралынга илереп келген.
Кызылдыӊ хоорай суду ук херекке хамаарыштыр күрүне буруудадыкчызыныӊ туружун барымдаалавышаан, чолаачыныӊ 2 чыл дургузунда транспорт башкарар эргезин казааш, аӊаа 200 шак иштинде ниитилелге ажыктыг ажылдар кылдырар деп түӊнелди үндүрген.
Прокурорнуӊ киирген дилээ-биле суд чолаачыныӊ «Тойота Спринтер» деп маркалыг автомашиназын күрүнениӊ өнчүзү кылдыр дамчыдып бээри-биле хавырган.
Шииткел хоойлу ёзугаар күш кирбээн.
Республика прокурорунуӊ улуг дузалакчызы С.А. ООРЖАК.
Р. Демчик очулдурган.
"Шын" №41 2023 чылдың июнь 7