Дүрген медицина дузазы болгаш айыыл-халап медициназының төвү республиканың наркология диспансери-биле кады күрүнениң автоинспекторлары “Арага болгаш автомобиль башкарары дүүшпес” деп акция-биле орукче үнүүшкүннү кылып, чолаачыларга эзирик автомобиль башкарарының түңнелдерин сагындырган.
Акцияның организакчылары чолаачыларга кедиптерге эзирик байдалдыг дег апаар карак-шилдерин кедип шенээрин саналдаан. Орук шимчээшкининиң киржикчилеринге эң-не коргунчуг орук озал-ондактары эзирик машина башкарганының түңнелинде болуп турарын бижээн буклеттерни үлеп, күзелдиг кижилерге когарааннарга баштайгы эмчи дузазын көргүзеринге тренингтерни эрттирген.
Сан-чурагай-биле алырга, бо чылдың 8 айының дургузунда республикага 631 орук озал-ондаа болган. Түңнелинде, 53 кижи амы-тынындан чарылган. Оларның 3-ү бичии уруглар. Орук озал-ондаа болган черге эмчи дузазы келиринге чедир 47 кижи амы-тынындан чарылган, 53 кижи кемдээн. Ниитизи-биле орук озал-ондаандан 983 кижи кемдээн. Оларның 134-ү эзирик чолаачыларның хайы-биле болган.
Кадык камгалалының медээлеринден.
Чуруктарны интернеттен алган.
«Шын» №73 2023 чылдың сентябрь 27