Кызыл кожууннуң Элегес-Аксы суурнуң хоочун чурттакчызы мен. Мени дүвүредип турар бок айтырыының дугайында бижикседим.
Суурнуң девискээринге бок айтырыын шиитпирлээри-биле, бок октаар 3 улуг бункерни тургусканы кончуг эки. Ынчалза-даа ол бункерлер аразынга бок октаар контейнерлерни база немей тургузуп каан болза деп бодаар мен. Назыны улуг, аарыг-аржык дээш кандыг-даа улус бар болгай, чаңгыс пакет бок тудуп алгаш суурнуң дуу бир ужунче кылаштаар-дыр бис. Ол-даа ындыг-ла ыйнаан харын, суурувус-ла арыг-силиг болур болза.
Эң-не сагышка анчыг чүүл — суурнуң шуут төвүнде чылдан чылче чыглып чыдар улуг өг ышкаш бок бар. Улуг-Хемская кудумчузунуң 17 дугаар бажыңы көдээ совет чериниң оран-савазы-дыр. Ол албан чери биле чуртталга бажыңнарының аразында улуг өг дег бок бар. Көдээ совет ажылдакчылары хүннүң-не арыгланыр бажың баарда, ол бок чанындан эртип дүжер. Даргалар ол бокту боттарыңар, ук девискээрниң чурттакчыларын, аштаңар дээр.
Дөрт ай бурунгаар амыдыралым аайы-биле Кызыл хоорайже түр када көжүп келген мен, бо үе иштинде ол бок аштаттынган ирги бе.
Анай МОНГУШ, күш-ажылдың хоочуну.
«Шын» №89 2023 чылдың ноябрь 22