Кызылдыӊ дазылга бажыӊында амыдырал.
«Салгалдар аразында чугаа» деп төлевилел-биле аныяктар дазылга бажыӊынга чедип келгеш, ажык-дузалыг хемчеглерни эрттирип турар. Кызылдыӊ башкы колледжизиниӊ «Компьютер четкизи» деп мергежилдиӊ студентилери аӊаа доктаамал барып, улуг назылыгларга мобильдиг телефонну канчаар ажыглаарын өөредип турарлар.
— Кырган-ава, кырган-ача бүрүзү смартфондан эӊ-не солун чүүлдерни, бистер ышкаш, тып алыр. «Ажыт, Сезам» сымыраныпкаш, гаджетти холунга тудуп алыр, ол-ла. Ажыглап билир кылдыр өөредип, тайылбырлап бээр-дир бис — деп, студент Чингис Ондар өөрүп чугаалаан.
Кызылдыӊ дазылга бажыӊыныӊ коллективи «Кызыл кош» акциязынга каттыжып, шериглерге ээлчеглиг дузаламчызын белеткээн.
— «Кызыл кош» деп акцияда идепкейлиг киржип турар улустуӊ бирээзи — бистиӊ даараныкчывыс Наталья Ыймыевна. Сеткилинден дузалап чоруур. Ооӊ мурнунда бистиӊ дайынчыларывыска элээн чылыг хептерни, рюкзактарны, таалыӊнарны даараан. Бо удаада чылыг белдирээштерни даарап белеткеп алган. А ол аразында мында чурттап турар энелерге чараш платьелерни, сумкаларны база даарап берген. Шак ындыг улуг буянныг кижиге чүгле «Четтирдим!» деп анаа чугаалаары эвээш ышкаш. «Кижилерге чедирген ачы-буянныг үүлеӊер, бумеранг ышкаш силерге дедир эглип келир болзун!» — деп, дазылга бажыӊныӊ директору Херел Күжүгет чугаалаан.
Кызылдыӊ дазылга бажыӊында ажыл-амыдырал үениӊ кыйгызы-биле деӊге хөгжүп сайзырап турар.
Тываныӊ Күш-ажыл яамызыныӊ медээзи-биле Р. Демчик белеткээн.
