Ава кижиге хол дегбе, аас-дыл кылып, хомудатпа! Өскелерге хомудааштың – өөң иштинге кылыың часпа! Чаңгыс чурттаар чуртталгаңда частырыг кылып, хилинчектенме, артып калыр ажы-төлүңге арыг адың (орууң) арттырып каг! Солагай холуң-биле аяк сунма. Улуг назылыг кижиниң мурну-биле эртип болбас. Улуг назылыг кижиниң арнынче дорт көрүп болбас. Өгде кандыг-даа саваның эмистиин эжикче көрүндүр тургуспас. Өгнүң эжии ыяап-ла хүн үнер чүкче турар. Өг эжии-биле аъттыг эртип болбас. Чурттап орар бажыңыңга ынак бол, от-көзүң артыжап, арыглап чор! Азырал амытаннарга каржы болба. Аъдыңны, ыдыңны, диизиңни үргүлчү суйбап чассыдып тур. Оларга ынак болур болзуңза, олар сээң аарыыңны бодунче ап үлежирлер. Бодуңдан ужулган хевиңни аңдарык хевээр арттырба, шын сал. Хирлиг хевиң үр шыгжава – чытталы бээр. Эдеришкен эжиң бактава. Хайыы-даа болза, орук херек, кандыг-даа болза оол херек. Оттулар ыяш киирип эккелгеш, ыяжың суугу аксынга дааш чокка аяар сал, ону октап болбас, дагжатпас деп чүвени билип ал. Өскен өөңнүң, бажыңыңның эжиин үнер-кирерде, дааштыг кылдыр хагба, оожум хаап чор.
Чылбак МОҢГУШ.
Чурукту интернет четкизинден хоолгалаан.
2025 чылдың август 28 “Шын” №33