Тываныӊ улуг-биче чурттакчылары «Географтыг диктант» делегей чергелиг акцияга киришкен.
Акция бүдүн делегейде 11 ажыг муӊ шөлдерге ноябрь 16-да 12.00 шакта эгелээн. Россияныӊ космонавтылары МКС – делегейниӊ космос станциязындан шупту киржикчилерге байыр чедирбишаан, бойдусту камнаарын чагып сүмелээш, чедиишкиннерни күзээн.
Чон аразынга география эртемин сонуургадып, Ада-чуртунуӊ географиязыныӊ талазы-биле билиин бедидип, ону сайзырадыр угланыышкынныг диктант бижидерин 2014 чылда Орус географтыг ниитилелдиӊ XV съездизи болуп турда, ооӊ Чөвүлелиниӊ даргазы Владимир Путин саналдаан.
Чырыдыышкын акциязыныӊ он дугаар юбилейлиг чылында «Туптен Шедруб Линг» хүрээзин диктант бижиир шөл кылдыр шилээн. Аӊаа «Чангыс демниг Россия» партияныӊ кежигүннери, Цэчэнлинг хүрээзиниӊ ламалары, Пандито Камбы-лама Гелек Нацык-Доржу, ТР-ниӊ Дээди Хуралыныӊ база Кызыл хоорайныӊ Төлээлекчилер хуралыныӊ депутаттары диктантыны бижээн.
— Диктантыныӊ элээн нарын айтырыглары база бар-дыр. Бодумнуӊ-даа, коллегаларымныӊ-даа тестизиниӊ түӊнелдери эки болур дээрзинге идегээр-дир мен. А эӊ кол чүве — география талазы-биле билиимниӊ деӊнелин билип алганым. Чырыдыышкын акциязы бедик деӊнелге эртти – деп, Кызылдыӊ Төлээлекчилер хуралыныӊ депутады Роман Поманисочкин демдеглээн.
«Туптен Шедруб Линг» хүрээзинге ындыг акцияны эрттирерге, чаагай чаӊчылдарны болгаш билиглерни онза үнелеп, чүдүлгени болгаш эртем өөредилгени катай сайзырадырынга идиг болур. Ада-өгбелеринден дамчып келген культуразы-биле чергелештир делегейни эртем таварыштыр билип алыры чугула дээрзин угаадып турар.
«Туптен Шедруб Линг» хүрээзиниӊ медээлеринден Р. Демчик очулдурган.
Чуруктарны интернет четкизинден хоолгалаан.
"Шын" №89 2024 чылдың ноябрь 20
