Грипптен камгаланырының эң-не бүзүрелдиг аргазы – аңаа удур тарыдары. Кызыл хоорайда уругларның республика эмнелгезиниң иммунитет быжыглаар салбырының дыңнадып турары-биле алырга, план ёзугаар 2023 чылда Кызыл хоорайда 34157 уругну гриппке удур тарыыры көрдүнген.
Оларның иштинде 6 айдан 3 харга чедир 2882 чаш уругну тарыыр ужурлуг. Бо хире назы-харлыг уругларны тарыырда, эмни 2 үзүп салыр. Амгы үеде бир дугаар тарылганы 2743 уруг алган. Ол дээрге планның 95,2 хуузу күүсеттинген. 2 дугаар кезээ-биле амдыызында 21 уругну тараан.
3 хардан 7 харга чедир уруглар садтарынче барып турар 5498 бичии уругну тарыыр сорулганы салган. Амгы үеде оларның 4303-ү тарыткан. Ажылдың 78,3 хуузу күүсеттинген.
Ол-ла хире назылыг уруглар сады барбайн турар 1589 уругну тарыыр ужурлуг тургаш, амгы үеде 1387 уругну тараан. Уруглар бажыңында планда кирген 52 уругнуң 24-ү тарылганы алган. 21740 школачыны бо чылын гриппке удур тарыыры планнаттынган. 8980 өөреникчи амгы үеде тарыдып алганнар. План ёзугаар 2396 студентиниң 1280-и тарыткан. Ниитизи-биле 18738 назы четпээн уруг гриппке удур тарылганы алган.
Гриппке удур тарыыр эм эпидемиологтуг сезон эгелээриниң мурнунда-ла баш удур кээп эгелээн. Август 29-туң хүнүнде 4 валентилиг 7990 доза Ультрикс-Квадри, школачыларга салыры-биле 12300 доза Совигрипп тарылгазы сентябрь 27-де келген.
Дараазында гриппке удур тарыыр эм ноябрь айның эгезинде келир. Вакцина келирге-ле, арткан уругларга база тарылганы салыр. Өөредилге черлеринче үнүүшкүннерни доктаамал кылып, тарылга ажылдарын чорудуп турар болгаш, план аайы-биле гриппке удур тарылга ажылдары үе-шаанда чоруп турарын Республиканың уруглар эмнелгезиниң иммунитет быжыглаар салбырының эргелекчизи Ай-Суу Эрес-ооловна Куулар демдеглээн.
Чылдың-на гриппке удур тарыдып алыры кончуг чугула дээрзин Ай-Суу Куулар чугаалаан: “Грипптен аарааш, дегдиргеш, эмнелгеде чыдып эмнедип турар уруглар аразынга тарылга албаан уруглар болганчок таваржыр. Тарыдып алырга, эки талазы аарый-даа бээр болза, чиик чадага эртер. Ынчангаш аргалыг болза тарылгадан ойталаан ажыы чок деп ада-иелерни кыйгырып турар бис. Чугаалап турбуже, тарылгадан ойталап кааптар ада-иелер база бар. Оларның уругларынга тарылга салыр эргевис чок. Тарылгадан ойталаан деп демдеглеп каары артар”.
Гриппке удур тарыткан соонда, чөдүрүмзүреп, эъди изип болур. Тарылга соонда эртер ындыг демдектерден корткан ажыы чок. Чамдык ада-иелер ону тарылга салдырган соонда аарый берген деп соора билип алыр таварылгалар база бар. Өскээр чугаалаарга, тарылганы салыптарга, вирустарга удур организмниң камгаланып турары ол.
Чыжыргана СААЯ.
Чурукту интернеттен алган.
“Шын” №79 2023 чылдың октябрь 18