Тываның Баштыңы 2023 чылда Дээди Хуралдың депутаттарынга Айыткалында эмчилерниң ат-алдарын көдүрүп, эмнелге албан черлерин эмчи кадрлар-биле хандырып, социал деткимче хемчеглерин калбартып, эмчилерниң теоретиктиг болгаш практиктиг билиглерин чаартынче угланган “Мээң эмчим” төлевилелди боттандырарын саналдаан.
Тываның Кадык камгалалының эмчи ажылдакчыларының билиг-мергежилин бедидер төптүң дыңнатканы болза, бирги чартык чылда республикада 242 эмчиге өөредилгени организастаан. Ол сорулгаже 1,5 млн рубльди угландырган.
Төлевилелдиң бир угланыышкыны – эмчи ажылдакчыларга саң-хөө деткимчезин көргүзери. Чамдык ховар мергежилдерниң төлээлеринге, специалитет база ординатура соонда бир дугаар ажылда тургустунуп турарларга, ол ышкаш соңгаартан Тывада ажылдап келген эмчилерге дээш 88 млн рубльди аңгылаан. Материалдыг деткимчениң ачызында өске регионнардан 37 эмчи чуртунда ээп чанып келген.
Тываның Баштыңының «Буянныг чүрек» деп күрүне шаңналын регионнуң медицина база фармацевтика ажылдакчыларынга, кадык камгалал адырында база медицина эртем-шинчилелдеринде эртем ажылдакчыларынга бир дугаар тывыскан. Бо чылдың эгезинден акша сертификаттарын 17 эмчи алды номинацияга алганын сагындыраал.
Төлевилел боттандырылгазы-биле чуртталга-коммунал ачы-дуза төлевирин төлээринге компенсацияны бээр. Көдээ черлерде чурттап турар эмчилерге ЧКА төлевиринге субсидия кылдыр 0,84 млн рубльди шилчидер.
ТР-ниң Чазааның парлалга албанының медээзинден.
"Шын" №58 2024 чылдың август 3
