Украинада Россияның Чепсектиг Күштериниң чорудуп турары тускай шериг операцияда киржип турар бистиң республикадан мобилизастаттынган шериг албанныгларга болгаш 55-ки гвардейжи мото-адыгжы (даг) бригаданың дайынчыларынга Тываның чурттакчыларының болгаш организацияларының чорутканы гуманитарлыг дузаның чүъгүн март айда чедиргениниң дугайында брифинг дүүн, апрель 2-де, Россияның улусчу фронтузунуң регионда күүсекчи комитединиң штавынга болуп эрткен.
Украинада дайынчы хөделиишкиннер болуп турар черлерге Тывадан гуманитарлыг дуза чүъгүн каш катап чедирип чораан арга-дуржулгалыг кижи, март айда гуманитарлыг дуза делегациязының удуртукчузу, ТР-ниң Дээди Хуралының депутады Эрес Хуурак, делегацияның кежигүннериниң бирээзи, Мөңгүн-Тайга кожууннуң чагыргазының даргазының хоойлу-дүрүм камгалалының талазы-биле оралакчызы, ТШО-нуң киржикчизи Эртине Успун, Россияның улусчу фронтузунуң регионда күүсекчи комитединиң даргазы Саима Далчин олар брифингиге киришкеннер.
Март айда Бай-Тайга болгаш Мөңгүн-Тайга кожууннарның чурттакчы чонунуң болгаш организацияларының чыгганы ТШО-нуң киржикчилеринге херек янзы-бүрү техника аймаан, эътти болгаш өске-даа чүүлдерни 5 болгаш 20 тоннаның улуг чүък машиналарынга чүдүрген. Ол машиналар Тывадан март 20-де үнгеш, март 27-де Украинаның Донецк хоорайдан ырак эвесте чурттакчылыг черге, дайынчы хөделиишкиннер болуп турар тулчуушкуннар шөлдеринден ырак эвесте девискээрге онча-менди четкенин Эрес Хуурак республиканың массалыг информация чепсектериниң ажылдакчыларынга дыңнаткан. Гуманитарлыг чүъктерни бистиң чаңгыс чер чурттугларывыс турар шериг кезээниң бүрүзүнге чедирери болдунмас ужурунда Тыва Республикадан мобилизастаттынган шериг албанныгларның төлээлери гуманитарлыг дузаны боттары ап келгеннер. Оларга гуманитарлыг дузаны ийи хүн дургузунда үлеп берген. Дайынчы хөделиишкиннерниң Донецк, Запорожье, Кременная, Купянск угланыышкыннарында тускай шериг операцияда киржип турар бистиң чаңгыс чер чурттугларывыс дуза дээш улуу-биле өөрүп четтиргенин Тываның чонунга дамчыдарын дилээн.
Дайынчы хөделиишкиннер чоруп турар болгаш ооң чоогунда девискээрде чурттакчы чоннуң амыдырал-чуртталгазының байдалы дыка берге, эң ылаңгыя аъш-чем чедишпес боорга, Тывадан гуманитарлыг дузаның аъш-чеминиң чамдыызын оларга бээр ужурга таварышканын, ол черлерниң чурттакчылары ачы-буян дузазы дээш өөрүп четтиргенин илередип, ыглажып турганын база брифингиге киришкеннер чугаалааннар.
ТШО-нуң киржикчилеринге Тываның чурттакчыларының гуманитарлыг дузазының дугайында Россияның улусчу фронтузунуң регионда күүсекчи комитединиң даргазы Саима Далчин чугаалап тура, ооң шынарының экижээнин чугаалаан. Тулчуушкуннар үезинде дайынчыларга кончуг херек шывыг четкилерниң, коптерлерниң, эмчи дузазының тускай чемоданнарның, автомашиналарның болгаш өске-даа техниктиг дериг-херекселдерниң сөөлгү гуманитарлыг дуза чүъктеринде көвүдээни эки деп демдеглээн.
Апрель айда ТШО-нуң киржикчилеринге гуманитарлыг дуза чыылдазы эгелээн. Ол гуманитарлыг дузаны Украинада бистиң чаңгыс чер чурттуг дайынчыларга Тиилелге хүнү– май 9-түң бүдүүзүнде чедирерин планнаан.
Ш. МОҢГУШ.
Буян ООРЖАКТЫҢ, Эрес Хуурактың тырттырган чуруктары.
«Шын» №25 2024 чылдың апрель 3
