— Чүге озалдай бердиң, Болат? — деп, башкызы айтырган.
— Школаже кел чорумда, үптекчилер халдааш, үптеп каапты.
— Чүүңнү үптеп алды?
— Онаалгалыг кыдыраажымны!
🙂
Математика кичээлинде башкы:
— Денис, мөөң эътти ийи деңге үлептерге, чүү болур-дур?
— Ийи кезек болур.
— Ол ийи кезекти база үлептерге?
— Дөрт кезек.
— Ону база үлептерге?
— Фарш!
🙂
— Уруглар, Африкада чурттап турар беш дириг амытандан адап көрүңерем?
— Үш зебра база ийи жираф! — деп, Мерген харыылаан.
🙂
Ачазы 3 харлыг Артыштан айтырган:
— Чүвүрүңнү чүге дедир кедип алган сен?
— Кырган-авам мени кедирип турду.
— Ам бодуң кайнаар көрүп турган сен?
— Телевизорже.
🙂
Кырган-авазы чараштаныр салонга чажын чолдайтыр таартып алган. Бажыңга келгеш, уйнуундан айтырган-дыр:
— Чаа, оглум, ам кырган энеге дөмей-дир мен бе?
— Чок, көңгүс дөмей эвес-тир сен. Ам кырган-ачага дөмей-дир сен.
🙂
4 харлыг Аяс авазындан айтырган:
— Төрүттүнер мурнунда мен каяа турган кижи мен?
— Мээң хырным иштинге.
— Канчап, мени чипкениң ол чүве бе?
🙂
“Шын” №88 2024 чылдың ноябрь 16
