Мээң маадырым Ай-кыс Ооржак – «Кызыл хоорайның тергиин эки турачызы – 2022» мөөрейиниң тиилекчизи. Ол – Кызылдың транспорт техникумунуң эрге-хоойлу болгаш социал хандырылга салбырының 3-кү курузунуң сургуулу база «Фемида» эрге-хоойлу хөй-ниити организациязының болгаш техникумунуң 3 чыл дургузунда идепкейжи волонтеру болуп чоруур.
Өскелерге ачы-дуза чедирер эки турачы ажылынче техникумнуң эрге-хоойлу эртемнериниң башкызы, «Фемида» эрге-хоойлу талазы-биле хөй-ниити организациязының удуртукчузу Наталья Бондаренко сургуулдарны хаара тудуп, оларның хей-аъдын киирип чоруур дээрзин Ай-кыс чугаалап турар.
– Өскелерге дуза кадары – буянныг ажыл. Буянныг ачы-дуза чедирерге, ол кижиниң бүгү чуртталгазында чылыг сактыышкын болуп артып калыр. Оон ыңай дуза чедирген кижилерниң хүлүмзүрүүн бо-ла сактып келгеш, өөрүүр мен. Волонтерларның дузазын хереглеп турар чон хөй-дүр ийин – деп, Ай-кыс волонтержу ажылының кол сорулгазын ынчаар тайылбырлап турар. Ол кижилерге дуза чедирерин ам-даа үр үеде уламчылаарын планнап турар.
Эки турачылар – чурттуң болгаш регионнуң чугула хемчеглериниң киржикчилери. 2022 чылдың чайын Кызылга Россияның хостуг хүрешке маргылдаазынга чүгле дуза кадарынга эвес, а Россияның янзы-бүрү булуңнарындан келген алдар-аттыг мөгелериниң хүрештерин ийи караа-биле көргенин Ай-кыс онзалап турар. «Тываның Чазак Баштыңының Чаа чыл байырлалы», #Кадыбис деп ачы-дуза чедирер акцияларга ол бодунуң өске волонтер эш-өөрү-биле тускай шериг хөделиишкининче долу эвес мөөңнээшкин-биле кыйгырткан чаңгыс чер чурттугларывыстың өг-бүлелеринге ачы-дузаны чедирип турар.
Волонтерлаарындан аңгыда, Ай-кыс уран чүүл болгаш чогаадыкчы чорукту сонуургаар. Ол техникумнуң чогаадыкчы сургуулдар каттыжыышкынының идепкейлиг киржикчизи. Школачы үелеринден чараш кыстар мөөрейиниң доктаамал киржикчизи, техникумга “Каас-чараш мисс” номинациязының каш дакпыр тиилекчизи. Тываның ортумак өөредилге черлериниң сургуулдар аразынга угаан мергежилгелериниң оюннарынга үргүлчү киржип турар. Техникумнуң сургуулдар аразынга хол бөмбүүнүң маргылдаазынга 3 дугаар черге төлептиг болган.
Тываның аныяктарын ниитилелге болгаш өске кижилерге хора чедирбейн, чүгле экини чедирип, сайзыралче болгаш чедиишкиннерже чүткүлдүг болурун Ай-кыс кыйгырып турар.
/ Алиса ДОНГАК.
Чурукту хууда архивтен алган
