Республиканың девискээринде “Улусчу картофель” губернатор төлевилелиниң боттанылгазы чоруп турар.
Бии-хем кожуунда ниитизи-биле 3379 өреге, 4003 өг-бүле бар. Ооң иштинде 630 эвээш хөреңгилиг өг-бүлелер бар. 630 эвээш хөреңгилиг өг-бүлелерниң аразындан картофель үрезини хереглеп турар 148 өг-бүлени тодараткан. Арткан 482 өг-бүлениң курлавырында эрткен чылдан картофель үрезини бар болган. “Улусчу картофель” губернатор төлевилелинче 148 өг-бүлени кииргеш, даңзыны тургускаш, бадылаан.
20–30 кг картофель үрезинин эвээш хөреңгилиг, хөй ажы-төлдүг өг-бүлелерге, чааскаан арткан кижилерге социал дуза кылдыр үлеп турары кончуг ажыктыг. Бо төлевилел социал байдалы чегей өг-бүлелерни деткип, оларның амыдыралының шынарын экижидип, картофель садып алыр акша-хөреңгизин камнап алыр арганы берип турар.
Картофель үрезини садып алыры-биле Бии-Хем кожууннуң чагыргазы “Идегелдиң чери” көдээ ажыл-агый хереглел кооперативи-биле 4,6 тонна үрезин садып алыры-биле 115 000 рубльге керээни чарган. 2023 чылдың май 15-тен тура кожууннуң сумуларынга болгаш Туран хоорайга картофель үрезинин үлеп эгелээн.
Агаар-бойдустуң байдалының аайы-биле Бии-Хем кожуунга картофель олуртур ажылдар 2023 чылдың май 20-ден эгелээр.
Ол ышкаш Бии-Хем кожууннуң чагыргазы Тыва Республиканың “Россельхозцентри-биле” ногаа үрезиннерин садып алган.
/ Чыжыргана СААЯ белеткээн.
"Шын" №35 2023 чылдың май 17
