Тыва Республиканың чурттакчы чону «Таарымчалыг хоорай хүрээлеңин хевирлээри» федералдыг төлевилел-биле 2026 чылда чаагайжыдар хөй-ниити девискээрлерин ам база шилиир аргалыг. Бүгү-российжи бадылаашкын 2025 чылдың апрель 21-ден июнь 12-ге чедир болур. Россияның Президентизиниң шиитпири-биле «Таарымчалыг хоорай хүрээлеңин хевирлээри» федералдыг төлевилелдиң боттанылгазы 2025–2030 чылдарга санап каан «Амыдыраарынга инфраструктура» деп чаа национал төлевилелдиң составы-биле уламчылаар.
«Госуслуги. Решаем вместе» мобильдиг капсырылга таварыштыр, zagorodsreda.gosuslugi.ru платформага азы хөй-ниити черлеринге волонтёрлар дузазы-биле бадылап болур. Волонтерлар кампаниязы март 3-тен ажылын эгелээн. Волонтер болур күзелдиг улус Добро.рф платформага бүрүткедип алгаш, чаарткан курс-биле өөредилгени эртип ап болур. 14 хардан өрү назылыг кижи чүгле «Госуслуги» порталга профилин шынзыткан болза волонтерлап болур.Апрель 7-ге чедир муниципалдыг тургузуглар бадылаашкынга киириштирер девискээрлерин тодараткан турар ужурлуг. Оон чурттакчы чон апрель 21-ден тура бадылаашкынга киржип болур.
Рейтингилиг бадылаашкынга Тываның 19 муниципалдыг тургузуу, ооң иштинде Кызыл болгаш Ак-Довурак хоорайлар, киржир.Федералдыг төлевилелдиң ачызында 2019 чылдан тура Тываның девискээринге 161 хөй-ниити черлерин чаагайжыткан. Төлевилелге тус черниң чурттакчыларының киржилгези чылдан чылче өзүп турар: 2021 чылда бадылаашкынга 35 546 кижи киришкен, 2022 чылда —50 125, 2023 чылда —102 701, а 2024 чыл- да —150 174 чурттакчы.
Бадылаашкыннар чорудар волонтерларның саны база өскен. 2024 чылда Тываның чурттакчыларынга шилилге кылырынга 1619 эки турачы дузалаан.
Бистиң корр.
«Шын» №12 2025 чылдың апрель 3