«Көдээ девискээрлерниң комплекстиг хөгжүлдези» федералдыг программа-биле чурттакчылыг черлерде чаагайжыттынар объектилер тудуунга «Тардан Голд» компания деткикчи ачы-дузазын көргүзүп турар. Программа күүселдезинче федералдыг субсидияны, республика болгаш тус чер бюджеттеринден кады акшаландырыышкынны болгаш бюджеттен дашкаар акша-хөреңгини хаара тудуп турар. Инвестор бюджеттен дашкаар миллион ажыг рубль түңнүг акша-хөреңгини салган.
Бо чылын регионда «Көдээ черлерниң комплекстиг хөгжүлдези» программа-биле көдээ суурларның социал инфраструктуразын экижидер элээн каш төлевилелдер боттанып турар. Оларның аразында Кызыл кожууннуң Сукпак суурда уруглар ойнаар шөлдү, Тес-Хем кожууннуң Самагалдай суурда роллердром-скейт-паркты, Өвүрнуң Хандагайты суурда «Россия – Тыва» деп стеланы чаагайжыдар, Бай-Тайгада Ээр-Хавак суурда уруглар ойнаар универсалдыг спортчу шөлдү дериир ажылдар чоруп турар.
Тываның Экономиктиг сайзырал яамызының дыңнатканы болза, амгы үеде тудуг шөлдерде шупту ажылдар доозулган, объектилерниң төлевилел-смета документациязынга дүгжүп турарын база кылдынган ажылдарның шынарын хынаар тускай комиссияның хүлээп алыышкынын манап турар.
«Тардан Голд» КХН кожуун чагыргалары-биле тудуг ажылын доозарынга деткикчи дузазын көргүзер керээлерни чарган. Тус чер чагыргалары таварыштыр керээ чарган тудуг организациязынче акша-хөреңгини керээ ёзугаар шилчиткен. Хууда сайгарлыкчы Чечен Кара-Сал Сукпак биле Хандагайты суурларда ийи объектини тудуп турар. «Сибтопгаз» КХН Самагалдай суурда роллердром-скейт-паркты, «Алдын» КХН Бай-Тайга кожууннуң Ээр-Хавак суурда уруглар ойнаар универсалдыг спортчу шөлдү туткан.
«Тардан Голд» КХН «Көдээ девискээрлерниң комплекстиг хөгжүлдези» федералдыг программа-биле боттандырган өске-даа төлевилелдерни деткип турарын регионнуң Экономиктиг сайзырал яамызы демдеглээн. Компания Шагаан-Арыг хоорайның 150 уругга хөгжүм школазының тудуун, 1 дугаар школаның капиталдыг септелгезин, Малчын кудумчузунда кудук тудуунга немелде акшаландырыышкынны берген.