Хөй-ниити палатазы — күрүне биле чоннуӊ аразынга харылзаа тудуп, чөвүлээр эргелиг орган. ТР-ниӊ Хөй-ниити палатазыныӊ чаа составынга республиканыӊ Баштыӊы байыр чедирген.
«Тываныӊ Хөй-ниити палатазыныӊ бешки составы бөгүн бодунуӊ ажылын эгелээн. Чаӊчыл ёзугаар ооӊ составынга республиканыӊ салым-чолу дээш сагыш човап чоруур ат-алдарлыг болгаш хүндүткелдиг кижилерни киирген: дайынчы хөделиишкиннерниӊ хоочуннарындан эгелээш, кожуун-сумуларныӊ идепкейлиг хамаатыларынга чедир. Ооң даргазы кылдыр Кызыл хоорайныӊ 1 дугаар уруглар садыныӊ директору Алеся Бажинаны шилип алган.
Социал айтырыгларны шиитпирлээринге, өг-бүлениӊ үнелиг билиглерин кадагалап, ону улам сайзырадырынга, ажы-төлүвүстүӊ өөредилге болгаш кижизидилгезинге улуг кичээнгей салып турар бис. Ынчангаш Алеся Александровнаныӊ школа назыны четпээн уругларныӊ өөредилге албан чериниӊ ажыл-агыйын организастаар арга-дуржулгазы шак ындыг бедик эрге-дужаалга херек болур.
Хөй-ниити палатазыныӊ ооӊ мурнундагы составынга кады ажылдажылгазы дээш өөрүп четтиргенимни илередип тур мен. Республика амыдыралынга болгаш эрге-чагырганыӊ шиитпирлерин сайгарарынга шудургу киржип турганнар. Хөй-ниити палатазы соӊгулдаларга хайгааракчыларны белеткеп, Президент В.Путинниӊ даалгаларыныӊ күүсеттинип турарын хынап турган. ТШО шериглеринге, оларныӊ өг-бүлезинге ачы-дуза чедирериниӊ талазы-биле ажылдап кирипкен. Чаа состав-биле кады тургузукчу ёзу-биле ажылдаар деп бодап турар мен» — деп, регионнуӊ Баштыӊы социал четкиде блогунга бижээн.
Р. ДЕМЧИК белеткээн.
«Шын» №97 2023 чылдың декабрь 20
