Апрель 19-та "Кенгуру" батут ареназының теннистээр залынга республика чергелиг чылдың болур стол теннизинге ээлчеглиг маргылдаа болуп эрткен. Ону Тыва Республиканың хереглекчилер кооперациязының эвилелиниң 100 чыл оюнга тураскаадып эрттирген. Маргылдааның кол деткикчизи Тывада база бир билдингир “Оргаадай” хууда көдээ ажыл-агый кооперативиниң удуртукчузу, Тываның көдээ ажыл-агыйының алдарлыг ажылдакчызы Эрес Мандан-оол болган.
Ол хүн 70 ажыг спортчу республиканың аңгы-аңгы кожууннарындан чыглып келген. Маргылдааны хар-назы аайы-биле 3 аңгы бөлүкке эр, херээжен командалар аразынга эрттирген.
17 харга чедир оолдар аразынга: Өвүрден Намзырай Ооржак чемпионнаан, ийиги черге – Кызылдан Айаал Өлчей, үшкү черге Барыын-Хемчиктен Бойдус-оол Монгуш төлептиг болган;
17 харга чедир уруглар аразынга: Барыын-Хемчиктен спортчулар шупту шаңналдыг черлерни ээлээн – Ангелина Херел-оол чемпионнаан, Фаина Монгуш — ийиги, Савелия Буянды үшкү черни ээлээн;
18-тен 49 харга чедир эр улус аразынга: Чаа-Хөлден Артемий Чымалдай тиилекчи болган; ийиги черни Барыын-Хемчиктен Алдар Ондар, үшкү черни Таңдыдан Аюш Ооржак алган;
18-тен 49 харга чедир херээжен улус аразынга: Чаа-Хөлден Диана Ондар тергиидээн. Ийиги чер- ни Айрана Ооржак, үшкү черни Таңдыдан Соланж Монгуш ээлээн;
50 хардан өрү эр спортчулар аразынга: Кызылдан Шолбан Очур чемпионнаан, ийиги черни Барыын-Хемчиктен Андрей Салчак, үшкү черни Тес-Хемден Оолак Бады ээлээн;
50 хардан өрү херээжен спортчулар аразынга: Кызылдан Мира Монгуш чемпионнаан, ийиги черни Кызылдан Марьяна Кара-Сал, үшкү черни Урана Докул-оол алган.
Команда аайы-биле болган маргылдаага 12 команда аразындан Чаа-Хөл кожууннуң командазы чемпионнаан. Өвүр кожууннуң командазы ийиги черни ээлээн. Үшкү черге Барыын-Хемчиктиң командазы төлептиг болган.
Шаңналдыг черже кирген спортчулар шупту грамоталар, медальдар болгаш акша шаңналдарын тус-тузунда алган.
Маргылдааның киржикчилери хөй болганындан оюн орай кежээге чедир уламчылаан. Хүнзедир ойнаанындан чеже-даа шылаан болза, спортчу байырлалдың уланчызы болган DJ JEDDIK дискотекага маргылдаа киржикчилери мага хандыр хөглеп алгаш, тарааннар.
Бистиң корр.
Чуруктарны интернет четкизинден алган.
"Шын" №15 2025 чылдың апрель 24
