Республиканың одаар чүүл шыгжамырларынче хөмүр-даш чедирилгези уламчылап, кышка белеткел чоруп турар. Амгы үеде республика девискээринде ниитизи-биле 39 хөмүр-даш склады долузу-биле ажылдап кирипкен.
Өвүр кожуунче сургакчылаашкын үезинде тус черниң хөмүр-даш складынга четтивис. Эде тургустунуушкун үезинде элээн чылдарда склад ажыглалга турбаан-даа болза, Хандагайты сумузунуң чурттакчызы Артемий Дагбыш кажан-бир шагда хөмүр-даш склады ажыглалче кирер дээрзинге бүзүрээш, үптеп-тоннаттырбайн кадарып чораан.
«5 харлыг турумда, авам-ачам бо хөмүр-даш складынга ажылдап эгеледи. Школаны дооскаш, дээди эртем чедип алгаш келгеш, бо складка ажылдай бердим. 1990 чылдарда чуртка эде тургустунуушкун үезинде-даа складты кагбаан мен. 3 чыл бурунгаар склад катап ажыттынарга, өөрүнчүг чорду. Чонувус хөмүр-дашты складтан садып ап турар апарды. Складтың эң-не үнелиг чүүлү – деңзизи-дир ийин. Ол бүдүн-бүрүн болза-ла, склад ажырбас» – деп, Артемий Дагбыш чугаалады.
А Артыш-оол Дагбыш складта хөмүр-даш деңзилээр специалист кылдыр ажылдап турар. Ооң чугаалааны-биле алырга, бир одалга сезонунда 3000 тонна чедир хөмүр-дашты дүжүрүптер. Амгы үеде хөмүр-даш складында 90 хире тонна хөмүр бар. Складта таңныыл, хөмүр чүдүрер техниканың чолаачызы, килдээр кижи дээш ниитизи-биле 6 кижи ажылдап турар.
Склад ажыттынгандан бээр Өвүр кожуунга хөмүр-даш үзүктелип көрбээн. Одаар чүүлдү чогуур үе-шаанда сөөртүп чедирип турар. Чон кышка белен.
Айдың ОНДАР.
Буян ООРЖАКТЫҢ тырттырган чуруктары.
“Шын” №43 2025 чылдың ноябрь 6