Хөмүр өртээ хыналдада.

Тываның Баштыңы одаар чүүл складтарында өртек-үнеге контрольду шыңгыырадырын айыткан.

Тываның Баштыңы Владислав Ховалыг одалга-энергетика комплекизин удуртуп турар бодунуң оралакчызы Александр Брокертке республиканың одаар чүүл складтарындан чурттакчы чонга хөмүрнү чедирер өртектер-биле байдалды контрольга алырын дааскан.
ТР-ниң Тарифтер талазы-биле албан чер-черлерде складтардан хөмүр саарып турар шынчы эвес сайгарлыкчылар одаар чүүлдү чедиргени дээш акшаларны немээн деп, чазактың аппарат хуралында дыңнаткан. Садып алганы тоннага-ла сөөртүп чедирген өртекти немеп турарын хереглекчилер дыңнаткан. Сөөртүп чедиргени деп билиишкинде хөмүрнү кайы хире хемчээлди садып алганындан хамаарылга чокка, хөмүр складындан садып алыкчының бажыңынга чедир чүъктүг автомобильдиң бир рейзи дээш төлевир кирерин Тарифтер албаны тайылбырлаан.
Албанның удуртулгазы олче кичээнгейни углап, чогуур контрольду күштелдирерин республиканың муниципалдыг тургузугларындан дилээн. Чижээ, Шагаан-Арыгда тус черниң сайгарлыкчызы тоннадан-на 400 рубльди ажылдап ап турганын албанның удуртукчузу Елена Бочарова чугаалаан. Кожуунга албанның инспекторлары келгеш, рейд хыналдазын кылырга безин, ол соксаваан. "Чоруптарывыс билек, тоннаны чедиргени дээш ол өртекти айыткан чарлалдар соцчеткилерде катап көстүп келген” – деп, Бочарова чугаалаан.
Специалистерниң чоруткан мониторингизи Кызылда база ындыг таварылгалар барын илереткен. Ылаңгыя чаңгыс сайгарлыкчыга хамааржыр найысылалда ийи складта бир тоннаны чедиргени дээш 700-тен 800 рубльди немеп турар болган.
“Сайгарлыкчыларже удур базымны кылып, тарифтерни өстүрүп, муниципалитет бүрүзүнге экономиктиг үндезилеттинген үстүкү өртектерни тургускан бис. Ындыг болзажок ону шын эвес ажыглап турар барымдаалар демдеглеттинген” – деп, Тываның Баштыңы чугаалаан. Владислав Ховалыг бодунуң оралакчызы Александр Брокертке, республика Чазааның иштики политика талазы-биле департаментиниң удуртулгазынга тургустунган байдалды эде көөрүн дааскан: хыналдаларны чорудуп, херек апарганда, чогуур хемчеглерни алырын организастаар.

Тываның Чазааның парлалга албаны.