Фото-чурук делгелгези
Улуг Тиилелге хүнүнүң бүдүүзүнде найысылал Кызылга «Чаңгыс чыскаалда эгин кожа» деп фото-чуруктар делгелгези ажыттынган. Туризм бажыңының бирги каъдында Халхин-Гол тулчуушкунунуң үезиниң төөгүлүг ак-кара фото-чуруктарын делгээн.
ТР-ниң даштыкы экономика харылзааларының талазы-биле агентилелдиң удуртукчузу Алдай-Мерген Ховалыг Халхин-Гол тулчуушкунунуң төөгүзүн тайылбырлаан:
— Эгин-кожа амыдырап-чурттап чоруур кожавыс Моол Арат Республика Совет Эвилелиниң көргүскен улуг дузазын дыка үнелеп чоруур. 85 чыл бурунгаар болган тулчуушкуннуң ужуру мындыг: 1939 чылдың май 11-де эжелекчи Япония Моолдуң чөөн чүк талазында девискээринче оор ёзу-биле халдаан. А үш чыл бурунгаар, 1936 чылда, эжелекчи чурттарның талазындан халдаашкын болу берзе бот-боттарын деткижер дугайында керээни Совет Эвилели биле Моол Арат Республика аразында чарган.
Бо тулчуушкун таптыг-ла 85 чыл бурунгаар, 1939 чылдың май 11-ден август 31-ге чедир, бүдүн чай дургузунда үргүлчүлээн. Ол үе дургузунда япон армияның 62 муң хире шерии кырылган. А совет-моол шериглер 20 хире муң дайынчыларын ол дайынга чидирген. Ол шериг операциязын Григорий Жуков удуртуп баштап турган. Ынчан Г. Жуков Совет Эвилелиниң Маадыры аттың эдилекчизи болган. Ол ооң бирги «Алдын сылдызы-дыр». Халхин-Гол тулчуушкунунуң киржикчилери ниитизи-биле 70 совет шериглер Совет Эвилелиниң Маадыры атка төлептиг болганнар.
Бо хүнге чедир бистиң өөрүвүс моолдар Ханхин-Гол хемниң эриинге болган тулчуушкунга сактыышкынны кезээде ханы хүндүлеп чоруур. Ынчангаш Моолдуң чиңгине консулу Чимид Гандбол-биле Ханхин-Гол эриинге болган тулчуушкунга сактыышкын делгелгезин организастаар дугайында дугурушкан бис. Мооң мурнунда бо делгелгени Иркутск хоорайга база делгээн. Япон армияны чылча шапканының 85 чыл оюнга тураскааткан делгелгеде Моолдан эккелген 40 ажыг төөгүлүг чуруктар бар.
Халхин-Гол тулчуушкунунга сактыышкын делгелгези найысылал Кызылдың Туризм бажыңынга 3 хонук үргүлчүлээр дээрзин агентилелдиң удуртукчузу дыңнаткан. Улуг Тиилелгениң байырлал хүннеринде Совет шериглерге хүндүткелди көргүзүп, делгелгени көрүп кээринче республиканың чурттакчыларын болгаш аалчыларын чалап турар.
Ада ТЮЛЮШТУҢ тырттырган чуруктары.
