Август 18-тен 20-ге чедир М.Б. Кенин-Лопсанга тураскааткан «Дүңгүр» деп бүгү Россия чергелиг фестиваль Тывада эгелей берген. Хемчегде 150 хире хамнар киржип турар. Кызыл хоорайдан 22 км черде «Бии-Хем» деп өглер комплекизинге фестивальдың шупту хемчеглери болур.
«Дүңгүр» — солун хемчег. Аңаа Россияның х амнары чыглып, мастер-класстарны көргүспүшаан, ус-тывыш ярмарказын делгээр. Оон аңгыда хамнар-биле дорт харылзаа кымны-даа сонуургадып болур.
l-ги фестиваль 2 хүн дургузунда болган болза, бо чылын 3 хүн үргүлчүлээр. «Дүңгүр» – 2023» фестивальдың программазында байырлыг ажыдыышкындан эгелээш, янзы-бүрү мастер-класстар болур. «Тывада хамнаашкын» деп эртем-практиктиг «төгерик стол», «Хамнаашкынга салым-чаяан» деп үш кезектен тургустунган мөөрей, «Хамның эң-не тергиин өөн» тодарадыры база планда көрдүнген. «Марьям» деп чөөн чүк сам школазының кежээки оюн-көргүзүү, «Саң» салыр дүнеки езулал, херээжен улуска «Чыланның самы» дээш оон-даа өске хемчеглер болур. «Тос Дээр», «Чеди хамнар салгалы», «Дүңгүр», «Тос-Карак», «Чеди-Хаан» хамнар ниитилелдери чон-биле ужуражылгаларны ээлчег езугаар кылыр.
Н.И. Пирогов аттыг университеттиң кафедра эргелекчизи В.Ф. Гречушниктиң шинчилел-экспериментизи, С.В. Бутусовтуң удуртулгазы-биле организм арыглаар езулал болгаш В.И. Зайцевтиң удуртулгазы-биле астрологияга хамаарышкан езулалдарны чон сонуургап болур.
Оон аңгыда, О.Д. Эртинениң бижээни «Билиг» деп номунуң таныштырылгазы база планда көрдүнген. Фестивальга «Ят-Ха» рок-бөлүү оюн-көргүзүглүг аалдап келир.
/ А. ОНДАР белеткээн.
"Шын" №61, 2023 чылдың август 19