Шагаа – шаг-үениң солчуушкунун, эргилдезин демдеглээн тыва чоннуң бурунгу, эң бедик сүзүглелдиг байырлалы.
Харлыг кыштың адак айы төнгелекте,
Хамык чоннуң өөрүп уткуур байырлалы,
Шаг аазы, шаг чаагайы – Шагаавыста
Чаңчыл ындыг, чалыы салгал ойнап-хөглээн.
Мөрен сумузунга Шагаа байырлалынга тураскааткан "Хөглүг старттарга" ниитизи-биле 6 команда идепкейлиг киришкен. Каткы-хөглүг, солун оюн-тоглааның түңнелинде "Хырбача" командазы тергиидээш, 1-ги черге төлептиг болган. Ийиги-үшкү черлерни "Сүлде" биле "Шагаа" командалары алган.
Даалы маргылдаазынга 9 команда киришкен. Мөөрейниң деткикчилери – "Хүнчүгеш" уруглар садының коллективи. Шаңналга төлептиг 1, 2, 3-кү чер алган командаларны өртектиг белектер-биле шаңнаан база ол ышкаш "Тиилелгеже чүткүл" дээш арткан командаларга суй белектерни сөңнээннер.
Шагаа бүдүүзүнде суурувустуң чонунга Шактар Лагхва-Сурун Амурович номну номчуп берген.
Шагаа байырлалында эрткен янзы-бүрү хемчеглерге деткикчилеп берген сумунуң чагырга, школа, уруглар сады, эмнелге, клуб, библиотека, почта дээш албан черлеринге, арбаннарның чурттакчыларынга, 1991 чылдың школа доозукчулары Анита Довууевнага, Чойгана Чамзыевнага, Мөңгүней Далчыновнага, Салбакай Михайловнага, Өлзеймаа Дегелдеевнага, 1996 чылдың доозукчуларынга болгаш Алдын-оол Агидаевичиниң, Буян Анай-ооловичиниң, Түмен Чингисовичиниң өг-бүлелеринге улуу-биле өөрүп четтиргенивисти илередип, бир ак меңгилиг от олуттуг кызыл Аът чылында силер бүгүдеге чүгле экини күзеп, ал-бодуңарга каң дег быжыг кадыкшылды, аал-ораныңарга буян-кежикти, ажыл-амыдыралынга чаа-чаа чедиишкиннерни күзедивис!
Шаг чаагай, Шагаа чаагай! Курай! Курай! Курай!
/ Чечекмаа САДИ, ТР-ниң алдарлыг ажылдакчызы.
Чуруктарны Чаймаа САНДАК тырттырган.
“Шын” №11 2026 чылдың март 26
