Харыысалгалыг болгаш кичээнгейлиг болуңар

Чаа чыл уткуштур Тываның чурттакчылары байырлалга белеткенип, бажың-балгадын каастап, чараштап, чоок кижилеринге белектер садар үе келген. Амгы үеде фейерверктер болгаш салюттар байырлалдың бир адырылбас кезээ апарган. Чаа чыл байырлалында пиротехниканың улуг-даа, бичии-даа кижилерге кемдээшкин кылыптар айыылы бар дээрзин билип алза чогуур.

Фейерверктерни ажыглап тургаш, айыыл чок чоруктуң дүрүмнерин хамаатыларга Россияның Онза байдалдар яамызының Тывада кол эргелели сагындырып турар.

Пиротехника садарда, бир-ле дугаарында, херек садыгны шилип алыр. Ол дээрге чүгле пиротехника садар чөпшээрелдиг болгаш шупту херек негелделери дээш харыылап турар тускай садыглар азы улуг садыг четкилеринде тускай секциялар-дыр. Садыгжылар ажыглаарының айыыл чок дүрүмнериниң дугайында база чижек кылдыр видеобижимелди көргүзүп тургаш, тайылбырлап бээр. Кызыл хоорайда сертификаттыг дөрт садыг бар.

Садып алыр мурнунда бараанны эки хынап көөр. Хавында бүдүрүп үндүрген үезин, маркировказын, шынарының демдээн айыткан турар ужурлуг. Пиротехниктиг кылыгларга Росстандарттың демдээ база бүдүрген чериниң дугайында медээ, шыгжаарының негелдези, ажыглаар хуусаазын, петард болгаш фейерверкти ажыглаарының аргаларын орус дылда тодаргай инструкциязын айыткан турар. Салып үндүрер мурнунда инструкциязын кичээнгейлиг номчуур база негелделерин албан сагыыр. Хавында инструкция чок болза, контрафакт продукция деп билип алыр.

Пиротехника – ойнаарак эвес-тир, ону оваарымчалыг ажыглаар. Фейерверктерни бичии уруглар холу четпес, кургаг черге шыгжаар. Ол ышкаш агаары эмин эрттир кургаг, изиг черге, оран-сава иштин чылыдар херекселдер чанынга шыгжап болбас.

Пиротехниканы кижилер, дириг амытаннар, кывар материалдар, ыяштар, оран-сава, чурттаар черлер, электри удазыннарының чанынга — айыылдыг зонага (хавында айыылдыг зонаның радиузун айтып каан) чазылдырары хоруглуг.

Айыыл болу бээр таварылгада дарый 01, 101 база 112 телефоннарже дыңнадыр.

Пиротехниктиг херекселдер кыпсып тургаш, чүгле бодуңар эвес, силерни долгандыр турар кижилер дээш харыысалгалыг болур ужурлуг силер дээрзин сактып алыңар. Харыысалгалыг болгаш кичээнгейлиг болуңар.

Бистиң корр.