Энергетика болгаш одалга яамызы лагерьлерниң корпустарын үзүк чок шынарлыг чырык-биле хандырар сорулгалыг «Бастион» КХН-биле керээни чарган. Дугуржулга ёзугаар ук организация бердинген даалгаларны үе-шаанда доозуп, Чагытай хөлдүң эриинде уругларның дыштаныр лагерьлериниң чырык чагыларын долузу-биле чаарткан.
– Пионержи лагерьлерниң ыяш корпустары 1967 чылда туттунган. Электри чагылары 57 чыл дургузунда элеп баксыраан. Чаъс чаап, хат хадыырга, сайгылгаан өжер, каш хонук улай чырык чок артар турган бис. Аъш-чемни одагга хайындырар ужурга-даа таваржып турган бис. Эрткен чылын Чазак Баштыңы Владислав Ховалыг уруглар дыштаныр лагерьлерни хынап кээп чорда, ийи дилег – «Чагытай», «Металлург», «Байлак» болгаш «Орленок» лагерьлериниң чырык хандырылгазын чаартырын база хөл кыдыында дыштаныр пляж тургузуп бээрин дилээн турган мен – деп, республиканың Профэвилел удуртукчузу Галина Сюрюн медеглээн.
Чагытай эриинде лагерьлерниң чырык хандырылгазының системазын чайгы дыштанылга эгезинде чаартып доосканын сагындыраал.
– Амгы үеде шупту лагерьлерде чырыктың күчүзү улгадып, хат-даа, чаъс-даа тоовас апарган. Уругларның, ада-иелерниң болгаш Профэвилел удуртулгазының өмүнээзинден регионнуң удуртукчузу Владислав Ховалыгга бодунуң сөзүнге ээ болуп, кыска хуусаа дургузунда уругларның дыштаныр лагерьлериниң чырык айтырыын шиитпирлеп бергенинге өөрүп четтирдивис! Артканын боттарывыс кызып ажылдаар бис! – деп, Галина Сюрюн өөрүп четтиргенин илереткен.
Алиса ДОНГАК.
Буян ООРЖАКТЫҢ тырттырган чуруу.
"Шын" №46 2023 чылдың июнь 24
