Декабрь 17-де Тыва үндезин культура төвүнге хендирбе сый шаварынга республика чергелиг мөөрей болуп эрткен. Аңаа республиканың аңгы-аңгы кожууннарындан ниитизи-биле 28 кижи киришкен.
Ол хүн Тыва төптүң оюн-көргүзүг өргээзинге кижи бажы кизирт, аът бажы козурт болган. Тыва чоннуң чараш оюнун сонуургап чедип келген аарыкчылар хендирбе сый шанчыпкан тиилекчини изиг-изиг адыш часкаашкыннары-биле деткип турганнар. Ук мөөрейниң бедик деңнелге эртип турарын улуг назылыг аарыкчылар онзагайлап демдеглээн.
Мөөрейге Эрзин биле Тес-Хем кожууннардан киржикчилер саны хөй болган. Оларның аразында Аңгыр-оол, Артыш Кочанай адашкыларны аарыкчылар аажок деткээн.
Тыва үндезин культура төвүнүң даргазы Игорь Көшкендей ук маргылдааны эге базым кылдыр саналдаан. Шагаада Тыва төпке хендирбе сый шаварынга республика чергелиг мөөрейни катап чарлаар дээн.
Мөөрей тыва чоннуң онзагай оюннарының бирээзи болганда, ооң келир үеде сайзыралы кижи бүрүзүнге дорт хамааржыр. Хендирбе сый шавар мөөрейниң боттанганынга Тываның Хүреш федерациязының даргазы Аяс Монгуш база Бурятияда чыл санында болуп турар хендирбе сый шавар мөөрейниң каш дакпыр киржикчизи Айбек Шимет улуг деткимчезин кииргеннер.
Республика чергелиг хендирбе сый шавар мөөрейге 28 киржикчиниң аразындан байзаже кирген тергииннери:
1-ги черни Тес-Хемниң Ү-Шынаа сумузунуң «Хендирбе сый шаварының Авыргазы» аттың эдилекчизи Алексей Дапый-оол алгаш, 30 муң рубль-биле шаңнаткан. Оон аңгыда тиилекчини Тыва Республиканың Даш чонукчуларының эвилелиниң даргазы Ай-Демир Шыырап тыва бижек-биле шаңнаан. 2-ги черни Эрзинниң Бай-Даг сумузундан Найсам Дандаа алгаш, 20 муң рубль-биле шаңнаткан. Аңаа тыва идик даараар ус-шевер Уранхай Сарыглар тыва кымчы-биле деткээн. 3-кү черге Тес-Хемниң Ү-Шынаа сумузундан Артыш Чурукпан төлептиг болган. Ол 10 муң рубль-биле шаңнаткан. «Тергиин ойнакчы» деп тускай номинацияга Тес-Хемниң Ү-Шынаа сумузунуң төлээзи Чимит Мажаа база Таңды кожууннуң төлээзи Дамырак Монгуш төлептиг болганнар.
Чурукту болгаш медээни Тыва үндезин культура төвүнден алган.
“Шын” №50 2025 чылдың декабрь 25
