"Сүбедей" спорт ордузунга ноябрь 21–23 хүннеринде республиканың бирги чери дээш хол бөмбүүнүң маргылдаазы болуп эрткен. Аңаа 2011—2012 чылда төрүттүнген оолдарның 16 база уругларның 19 шилиндек командалары киришкен. Маргылдааның кол сорулгазы – бистиң республикага “Спорт чуртталганың хемчээли” база “Хол бөмбүү школада” деп төлевилелдерни калбаа-биле өөреникчилер аразынга сайзырадыры.
Маргылдааның ажыдыышкынында спортчу командалар белеткээр төптүң оралакчы даргазы Дмитрий Козулья, кол шииткекчи Салгын-оол Түлүш, тренер башкылар болгаш ойнакчыларга спортчу чедиишкиннерни, тиилелгени күзеп, байыр чедирген соонда, бөлүктер аразында оюннар эгелээн.
Ноябрь 21–22 хүннеринде бөлүктер аразынга оюннарга, шыырак 8 команда аразынче кирер дээш, команда бүрүзү белеткелин көргүзүп, ойнааннар. Эштери дээш командазы дээш, аарыкчылар 3 хүн иштинде көдүрлүүшкүннүг байдалга хөглеп, ырлажып, деткип келгенин демдеглевес арга чок.
Түңнел оюннарже дараазында 4 команда кирген. Уруглар аразынга Чөөн-Хемчиктиң командазы (тренери Айрана Монгуш) бүзүрелдии-биле 2:0 санга Мөңгүн-Тайганың командазын уткаш, 3-кү черге төлептиг болганнар. Тиилекчи ат дээш түңнел оюнга Кызыл кожууннуң “Авырга” спорт школазының уруглары (тренери Эрес Ондар) 2:0 санга Олимпий курлавырлар училищезиниң (тренери Светлана Тодошева) командазын уткаш, 1 дугаар черни алганнар. Тиилекчи командада Ямзык шыырак халдакчы деп атка төлептиг болган.
Оолдар аразынга 3 дугаар шаңналдыг чер дээш тренер башкы Ай-Сүрен Сааяның белеткээни Мөңгүн-Тайганың командазы шыырак удурланыкчызы Каа-Хемниң командазын 2:0 санга тиилээн. Тулган тиилекчи дээш түңнел оюнга тренер башкы Чойган Дадар-оолдуң белеткээни Улуг-Хемниң Иштии-Хем ортумак школазының командазы 2:1 санга Кызыл кожууннуң командазын (тренери Айдыс Ондар) уткаш, 1 дугаар черге төлептиг болган.
Маргылдааны чарлаарынга, санаарынга, шииткелинге олимпийжи курлавырлар училищезиниң сургуулдары эки киришкеннер. Ол ышкаш хол бөмбүүн сайзырадып чоруур тренер башкыларга база шыырак ойнакчыларга спортчу чедиишкиннерни күзедивис.
А.Чамбал-оол.
“Шын” №92 2024 чылдың ноябрь 30
