Россияның эрге-ажыктарын камгалап, Украинада чоруп турар тускай шериг операциязының киржикчилериниң хөй кезии тайбың ажыл-иштиң кижилери.
Дайынчы тулчуушкуннарга олар кижизиг, ажыл-агыйжы мөзү-шынарын оскунмайн, чанып келген дораан ажыл-ишче шымнып кире бээрлер. Ындыг дайынчыларның дугайында «холдары ажылды «сакты берген» деп чон чугаалаар.
Ындыг дайынчыларның бирээзи Бии-Хем кожууннуң Аржаан сумузунуң чурттакчызы Аяс Сүрүнчүк. Бичиизинден-не ажыл-агыйжы болгаш, бир-ле ажылды тып, акша-төгерикти ажылдап аптар чораан. Өөнүң ишти-биле малчыннарның шээр малын хол хачылары-биле кыргып турганнар. Ындыг ачы-дузаның хыын тып, электри хачылары-биле хой-өшкү кыргыыр деп шиитпирлээннер. Оларны садып алырынга эвээш эвес акша-төгерик херек. Ынчангаш 2021 чылда «Социал керээ» программага киржип, керээни чаргаш, ооң акшазы-биле мал дүгү кыргыыр электрилиг хол машиналарын тускай дериг-херекселдери-биле кады садып алган. Чүге дээрге сөөлгү үеде хой-өшкү дүгүнге хереглел тыптып келген, ону малчыннар саткаш, элээн орулганы үндүрүп ап болур апарган. А малчын бүрүзү аар өртектиг дериг-херексел садып ап, ону чылда чаңгыс катап ажыглаан дүжүү чок. Ооң орнунга мал дүгү кыргыыр тускай дериг-херекселдиг кижилер-биле дугурушкаш, оларның ачы-дузазын ажыглааш, өртээн төлеп бергени дээре. Мындыг байдалды сайгара бодааш, Аяс Сүрүнчүк бодунуң хууда херээн ажытканы ол. Дүк кыргылдазының үезинде шалыпкын ажылдааш, элээн хөй орулганы киирип ап болур. Хой-өшкүнүң дүгүн кыргыырындан аңгыда, малчыннарның кыштагларында кажаа-хораазынга зооветеринарлыг дезинфекция ажылдарын база чорудуп турганнар.
2024 чылдың күзүн Аяс Сүрүнчүктү долу эвес мөөңнээшкин-биле шеригже келдирткен. Бодунуң шериг албан-хүлээлгезин ол төлептии-биле күүсеткеш, бо чылын шөлээлеп чанып келген. Шөлээде мен деп, Аяс Сүрүнчүк шөлээттеп олурбаан. Хой-өшкү кыргылдазының кидин түлүк үезинде ажылдап кирипкен. Ооң удуртканы бригада Аржаан сумунуң араттарының малының дүгүнүң кыргылдазынга шалыпкын ажылдаан, араттарның кыштагларынга дезинфекцияны база чоруткан.
Үш ажы-төлдүң адазы Аяс Сүрүнчүк удавас Украинада чоруп турар тускай шериг операцияже база катап чоруптар. Шериг албан-хүлээлгезин төлептиг күүсеткеш, аал-оранынче онча-менди чанып кээрин чаңгыс чер чурттуунга аржаанчылар күзеп турарлар.
Ш. КҮЖҮГЕТ.
Чуруктарны интернеттен хоолгалаан.
"Шын" №52 2024 чылдың июль 13
