Россияның аңгы-аңгы девискээрлеринге чаъс-чайык чаап, суг хөме ап, чурттакчы чон бажың-балгат чок артып, когараан дугайында медээлерни массалыг информация чепсектеринге бо-ла дамчыдып турар.
Тывада чаъс-чайык-биле байдал черле барыктыг. Ынчалза-даа дараазында чүүл Кызылдың чурттакчыларын дүвүреди бээр. Элээн суггур чаъс чаарга-ла, хоорайның чамдык девискээрлерин чаъс суу хөме ап, эң ылаңгыя чадаг кижилер эртер-дүжери берге апаар.
Кызыл хоорайга чаъс чаарга-ла, хөй чон чыглып, бараан-сараан садып алыр “Гаруда” хааглыг рыноктуң баарынга чаъс суу хөөлбектелип, садып алыкчыларга эртер-дүжер арга чок болу бээр. Дүүн, июнь 18-те, Кызыл хоорайга кезек суггур чаъс чагган. “Гаруданың” чанында хөөлбекти кижилерниң чамдыызы идиктерин уштуп каапкаш, кызыл-даван сүзүп эрттип турганнар.
Мындыг байдалды болдурбазы-биле “Гаруданың” мурнунда суг хөөлбектелир черге чаъс суу агып кире бээр кудуктарны кылып каарын кызылчылар шагда-ла сүмелеп турганнар.
Кызылга чаъс хондур-дүндүр чайыктап чагбаанын агаар-бойдустуң өршээли деп санап болур. Бир эвес ынчаар чаар болза, Кызылдың хөй каът бажыңнарының адаанда подвалдарже чаъс суу киир агып, коммунал озал-ондаа болуп болурунуң айыылы бар. Кызыл чаъс-чайык суун дүрген эрттирер канализациязы чок хоорай дээрзи специалистерге билдингир болгай.
Бистиң корр.
“Шын” № 45 2024 чылдың июнь 19
