Орёл хоорайга май 17–18 хүннеринде хоочуннар аразынга самбога Россия чемпионады болуп эрткен. Маргылдаага 49 региондан 357 мөге киришкен. Чемпионаттың кол сорулгазы — национал спорттуң хевирлерин калбаа-биле сайзырадыры база боттандырары.
Сөөлгү чылдарда самбо хүреш делегейде калбаа-биле сайзырап турары улуг чедиишкин. Бистиң республикадан ол маргылдаага хостуг хүрешке ССРЭ-ниң спорт мастери база самбога, дзюдога Россияның спорт мастеринге кандидат Анатолий Кара-Сал эң улуг 70–75 хар чедир назылыг самбистер аразынга чааскаан барып киришкен. Хоочун мөге 71 килдиг мөгелер аразынга шаңналдыг 3-кү чер дээш хүрешке, ССРЭ-ниң самбо хүрешке спорт мастери казах мөгени ойнап алгаш, октябрь 24–27 хүннеринде Душанбе хоорайга болур делегей чемпионадынга киржир эргени чаалап алганы улуг чедиишкин.
Анатолий Үзенович хоочуннар аразынга хостуг хүрешке делегей чемпионаттарынга хөй удаа 2–3 дугаар шаңналдыг черлерниң, дзюдо хүрешке Россияның 2024 чылда хоочуннар аразынга чемпиону деп аттың болгаш ол ышкаш самбо хүрешке Россияның 3 дакпыр шаңналдыг черлериниң эдилекчизи. Үлегерлиг хоочун мөге бо чылын январь айда 70 харлаан байырлалында “Тыва Республиканың мурнунга ачы-хавыяазы” деп медальды алган.
Алексей ЧАМБАЛ-ООЛ, спорттуң хоочуну
Чурукту интернеттен алган.
“Шын” №19 2025 чылдың май 22
