Сентябрь 21-де В.С. Биче-оол аттыг Хүреш стадионунга Кызыл хоорайның 110 чылы база республикада Кадыкшыл чылынга тураскаадып, хоочун мөгелер аразынга тыва хүреш маргылдаазы болуп эрткен.
Маргылдааның байырлыг ажыдыышкынынга “Эрткен үени хүндүткел-биле, келир үени бүзүрел-биле” деп кыйгырыгны салып, Наадым 2024-те бичии мөгелер аразынга тергиидеп, шаңналдыг черлерже кирген мөгелерге, салгалдарывыска, Тыва национал хүреш федерациязының мурнундан хоочун алдарлыг мөгелеривис, шаңнал-мактал бижиктерни тыпсып, айызын кылганы чоргааралдың улуг демдээ болган.
Хоочуннар хүрежиниң ачыр-дачыр хүрешкениниң түңнелинде:
45–50 харга чедир назылыг мөгелер аразынга Чөөн-Хемчик кожууннуң Начыны Орлан Монгуш шүглүп, 1-ги черни алган. Өвүрнүң Хартыга мөгези Алик Комбуй-оол үжүүрлешкеш, 2-ги черни алган. 3–4-кү шаңналдыг черде Аяс Сувак Каа-Хем база Алексей Ондар Чөөн-Хемчик мөгелери төлептиг болган.
51–55 харга чедир мөгелерге Сүт-Хөлдүң Арзылаң мөгези Вячеслав Монгуш шүүлген, Кызыл кожуундан Геннадий Монгуш үжүүрлешкен, 3–4-кү шаңналдыг черде Буян Дүвендей Өвүр база Хеймер Монгуш Барыын-Хемчик болган.
56–60 харга чедир мөгелерге Өвүрнүң Арзылаң мөгези Чимит Куулар шүүлген, Улуг-Хемден Сангак-оол Ооржак үжүүрлешкен, 3–4-кү шаңналдыг черде Таңдының кожуун Арзылаңы Анатолий Үндезин база Кызыл хоорайдан Шолбан Куулар болганнар.
Тергиидеп үнген хоочун алдар-аттыг мөгелеривиске хоорайның чагыргазы медаль, диплом, сертификат база өртектиг белектерни тывыскан. Ол ышкаш хоочун мөгелерге бүгүдеге экини күзедивис!
А. Чамбал-оол.
“Шын” №74 2024 чылдың сентябрь 28
