"Херел" спорт өргээзинге декабрь 8–9 хүннеринде ССРЭ-ниң хостуг хүрешке спорт мастери, дагдыныкчы-башкы, тренер, Бай-Тайга кожуунга уругларның спорт школазын тургускан баштайгы директору Александр Кимович Күжүгеттиң чырык адынга тураскааткан хостуг хүреш маргылдаазы болган. 16 харга чедир назылыг 250 оолдар, уруглар аразынга быжыг кадыкшыл, спортчу чедиишкиннер дээш республика чергелиг хостуг хүреш маргылдаазы бедик деңнелге болуп эрткен.
Ук маргылдааны хоочун башкының оглу, медицина эртемнериниң кандидады, хирург эмчи Росси Александрович Күжүгет база төрелдери, республиканың Спорт яамызының, Спортчу хүрештер чөвүлелиниң киржилгези-биле организастаан. Хостуг хүрешти республикага калбаа-биле сайзырадыр, бичии мөгелерни деткиир база келир үениң Олимпий оюннарының тиилекчилерин белеткээр сорулга-биле бо маргылдааны эрттирген.
Маргылдааны Хөөмей академиязының бичии хөөмейжилериниң хөөмей-сыгыды-биле ажыткан. Бо маргылдааны тренерлерниң, бичии мөгелерниң база ада-иелерниң дилээ-биле чылдың-на фестиваль хевирлиг кылдыр эрттирери көрдүнүп турар. Бичии мөгелерни деткиири-биле, кожуун, суму аайы-биле хостуг хүрештиң мөгейикчилери, хоочуннары, ада-иелер келген.
Маргылдаа соонда шаңналдыг чер алган мөгелер аразынга лотерея база ойнаткан. Түңнелинде соталыг телефоннарны Алдына Кыргыс, Экер Донгак, Чамыян Кара-Сал, Даң-Хаяа Адыг ойнадып алыр аас-кежиктиг болганнар.
Боттарының килдеринге дараазында бичии мөгелер шылгарааннар: 33 килге – Алдын Кажыкай, 35 килге – Чурумал Ооржак, 38 кг – Шинчик Санчыр, 39 кг – Аңгырак Монгуш, 41 кг – Шаанак Ооржак, 44 кг – Аюр Хомушку, 46 кг – Чамзо Ямбу, 48 кг – Сайын Саая, 52 кг – Шагдыр Арзылаң, 54 кг – Лилия Байыр, 57 кг – Максим Монгуш, 62 кг – Даң-Хаяа Адыг, 62 кг – Айтык Ондар, 68 кг – Чамыян Кара-Сал, 75 кг – Экер Донгак, 85 кг Намзырай Монгуш, 100 кг – Найыр Куулар.
“Тиилелгеже чүткүл дээш” деп шаңнал алган Таңдының мөгелерин, Барыын-Хемчиктен Начын Сааяны, Санчай Ооржакты, Чөөн-Хемчиктен хоочун мөге, улуг деткикчи Владимир Монгуштуң салгалдарын демдеглээр апаар.
Алексей Чамбал-оол.
Авторнуң тырттырган чуруктары.
“Шын” №95 2023 чылдың декабрь 13
