Чаа чыл байырлалдарында хоочуннарны деткиири-биле, оларның кадыын камнаары-биле Чаа чылдың ачы-буянныг хемчегни эрттирген. Ол хемчег Тываның күрүне университединиң үшкү курузунуң студентизи Санчай Салчактың Россияның аныяктарының грантылар мөөрейинге тиилээн болгаш Аныяктар херектериниң талазы-биле федералдыг агентилелдиң деткимчези-биле боттанып турар «Спорт болгаш кадыкшыл студиязы» деп төлевилелиниң бир кезээ болуп эрткен.
Төлевилелдиң удуртукчузу ТывКУ-нуң химия салбырының доцентизи, химия эртемнериниң кандидады О. Кендиванның саналы-биле организастаан. Аңаа Бай-Тайга кожуундан болгаш Кызыл хоорайдан хоочуннар киришкен, оларга комплекстиг кадыкшыл программазын белеткээн. Аквааэробика болгаш тыныш мергежилгелери бо хемчегге кол рольду ойнап, мага-боттуң быжыын, амыдыралчы күжүн болгаш сагыш-сеткилдиң эки байдалын бедидеринге дузалаан. Күш-культура болгаш кадыкшылдан аңгыда, хоочуннарга халас профилактиктиг болгаш катап тургузуушкун эмнээшкиннерин база саналдаан. Программага эмнээр массажтар, фито-доскаарга эмнээшкиннер, ол ышкаш эмчи консультациялары болгаш УЗИ кирген. Киржикчилер кадыкшылының дугайында ажыктыг медээлерни алган.
Хемчег үезинде хоочуннар Чаа чылдың белектерин, ооң-биле чергелештир ТывКУ-нуң студент волонтёрларының кылган камгалал билектээштерин алганнар. Улусчу ёзу-чаңчылдар-биле алырга, кызыл удазын камгалалдың, амыдыралдың, узун назынның күштүг демдээ деп санаар. Шын сеткил-биле берген ындыг белек хоочуннарга чүгле каасталга эвес, а кижиниң сагыш-сеткилин чылыглаптар ёзулуг талисман болур.
Хемчег үезинде киржикчилер ырлажып, дыштанып, эм оъттардан кылган шайларны амзап, эки сагыш-сеткилдиг болгаш бот-боттарын деткижер арганы алганнар.
Организакчылар хемчегни деткээн ачы-буянныг деткикчилерге: «Угулза» КХН-ге, «АллерДок» эмнелге төвүнге, «Океан» бассейнге, «Бай-Булуң» кафезинге, эмчилер — Оюмаа Савындайга, Олча Монгушка, волонтёрлар — Азиана Донгакка, Виктория Ондарга, Аялга Нурзатка, Санчай Нурзатка өөрүп четтиргенин илередип турар.
/ Ольга КЕНДИВАН.
Чуруктарны авторнуң архивинден алган.
“Шын” №1 2026 чылдың январь 15
