Кызыл хоорайның улуг назынныгларын хаара тудуп, оларның кадыкшылынче кичээнгей салып турарынга аажок ѳѳрүп турар бис. Бо чылдың сентябрь, октябрь айларда Кызыл хоорайның Кадыкшыл төвүнге биске, улуг назынныг хоочуннарга, бүгү талалыг эмчи хыналдазын эрттиргени кончуг эки болган.
Ооң-биле чергелештир тренажёр өрээлинге сула шимчээшкиннер кылырын, скандинав кылашты айтып берип, танцы-самны безин ѳѳреткени хей-аъдывысты көдүрген.
Бо бүгүнү улуг эмчи Белекмаа Доржуевнаның удуртулгазы-биле дуржулгалыг эмчилер Артыш Хайындырыпович, Начын Хураган-оолович өөредип турду. Хоочуннар алды неделя дургузунда аажок идепкейлиг, чаңгыс-даа хүн үспейн барып турдувус.
Диетолог эмчи Лидия Сереевна янзы-бүрү чемнерни кым, канчаар чиирин, ажыглаарын тайылбырлап, арга-сүмелерни берген. Улуг назынныг кижилер сүттен кылган чемнерни, ногаа-чимисти чемге үргүлчү ажыглаарын сүмелеп турду.
Эмчи Аймаа Сүреновна солун темалыг ужуражылгаларны кылган. Дээди категориялыг ортопед эмчи Нелля Александровна «остеопороз» дээр аарыгны кончуг билдингир кылдыр тайылбырлап берген. Психолог, терапевт дээш өске-даа эмчилерниң база арга-сүмелерин алыр аргалыг болдувус. Улуг назылыг хоочуннарывыс кадыы экижип, чиигеп келгенин демдеглеп турдулар.
Бо төптүң эмчилеринге улуу-биле четтиргенивисти илередип мѳгейдивис. Улуг назынныглар аразынга мындыг ужуражылгаларны, чараш хемчеглерни үргүлчү эрттирип турарын күзээр-дир бис. Эмчилерге кадыкшылды, ажылынга чедиишкиннерни күзеп артывыс.
Ольга АРГУН, хоочун пенсионер.
“Шын” №95 2023 чылдың декабрь 13
