"Бистиң республикавыста бир дугаар "Регион17" деп хууда кадрлар агентилели ажылдап эгелээн. Ук албан чериниң Күш-ажыл албанынга хоойлу ёзугаар бүрүткедип алыр үрде манааны күзели ам-на боттанган. Чурттакчы чонувусту ажылга хаара тудар буянныг ажылдың оруу ажык болзун!" - деп, Кызыл хоорайның Чонну ажылга хаара тудар төвүнүң даргазы Амур Увангур бодунуң блогунда бижээн.
2014 чылдан тура 3 эжишки аңгы-аңгы регионнарже ажылдакчылар шилиир талазы-биле боттарының ажылын албан ёзугаар бүрүткел чокка кылып чорудуп келген. Оларның ажылының ачызында республиканың чурттакчы чону Сахалинче, Камчаткаже, Газпромче дээш янзы-бүрү вахта ажылдарынче ажылдап чоруп турар. Социал керээ дузазы-биле олар ажылдаар оран-савазын амгы үениң негелделеринге дүүштүр кылгаш, боттарының ажыл-ижин хоойлу ёзугаар чорудар аргалыг апарган.
