Сүт-Хөл кожууннуң Бора-Тайга суурда «Аныяктар болгаш уруглар» национал төлевилел-биле школада капитал септелге ажылдары чоруп турар.
Кожууннуң чагырга даргазы Орлан Монгуш тудуг ажылдарының дугайында дыңнаткан: «Бора-Тайга ортумак школазында капитал септелге ажылдары график ёзугаар чоруп турар. Объектини «Депшилге» кызыгаарлаан харыысалгалыг ниитилел хүлээнип алган. Тудугну участок даргазы Кежик Ондар база бригадир Шолбан Монгуш башкарып турар».
ТР-ниң Өөредилге яамызы, “Күртудугчагыг” албан чери школаның удуртулгазы-биле доктаамал харылзаалыг ажылдап, телеграмда бөлүктү ажыткан. Ында кылдынган ажылдар дугайында отчёттарны хүн бүрү дыңнадып турар.
Бо хүнде бергедежип турар айтырыглар чок. Тудуг материалы шупту бар, ажылдакчылар четчир. Септелге ажылдары колдуунда төнчү чадазынче чоокшулап турар. Объектини хуусаадан эрте дужаар сорулга салдынганын бригадир дыңнаткан.
ТМГ Медээлер.
Чуруктарны ТМГ-ден алган.
“Шын” №26 2025 чылдың июль 10
