Бөгүн, сентябрь 27-де, Балгазын суурдан каш километр ырак черде хөй-ле машина-балгат чыылган, ыры-хөгжүм куттулган байырланчыы-даа кедергей. Ол дээрге “Идегелдиң шөлү” көдээ ажыл-агый бүдүрүлге кооперативиниң картофель шөлдеринде дүжүт ажаалдазы болуп турары ол-дур.
«Өг-бүле шыгжамыры» губернатор төлевилелиниң киржикчилери боттарының дүжүдүн ажаап келгеннер. Шөлде 300 хире кижи ажылдап турар. Картофель казар тускай трактор шөлдү дургаар аңдарарга, кижилер чүгле чыып, шоодайлап четтигип турар болду. Ынчангаш ажыл дыка дүрген, демниг чоруп турарын эскердивис.
Дүжүт ажаалдазы-биле чергелештир көдээ ажыл-агый ярмарка-делгелгезин база организастаан. Ында ногаа-чимис, дузаан, вареньелээн аъш-чем, мал чеми база хаван оолдары, кастар дээш чүү-даа бар. Картофельди чиик өртекке садып алыр арга база бар.
Ол ышкаш өг-бүлелер аразынга ыры-хөгжүм мөөрейин база чарлаан.
“Идегелдиң шөлү” көдээ ажыл-агый бүдүрүлге кооперативиниң даргазы Алёна Куулар ажыл-агыйын таныштырды: «Бо чылын бистиң кооператив 60 хире гектар шөлге картофельди олурткан. Ооң иштинде 7 гектар черде «Өг-бүле шыгжамыры» төлевилелдиң киржикчилериниң картофелин тараан. Бөгүн олар бис-биле демнежип тургаш тараан картофелиниң дүжүдүн ажаап ап турары бо. Бис оларның картофелин чемишчидип, канчаан ажаап өстүрерин айтып берип дузалажып турдувус. Мындыг берге кааңдаашкынныг үеде эки дүжүттү өстүрүп шыдаптылар. Бистиң кооператив-биле демнежип ажылдаанывыс түңнелинде бо шөлдерде картофельдиң эки үнгенин көрүп тур силер.
Бо чылын бистиң шөлдерде ийи дүжүткүр сорттар тарыттынган. Ол дээрге «Беллароза» биле «Адретта» деп сорттар-дыр...
(Материалды улаштыр солуннуң дараазында үндүрүлгезинден номчуур силер)
Алдынай СОЯН.
