Чаагайжыдылга
«Таарымчалыг хоорай хүрээлеңин хевирлээри» федералдыг программаның онлайн-бадылаашкыны доостурунга чедир 9-ла хонук арткан. Келир 2023 чылда кайы хоорай, суур чаагайжыттынары бо хүннерде шиитпирлеттинер. Төп кожуун Улуг-Хемде бадылаашкын кандыг чоруп турарыл?
Улуг-Хем кожуун чагыргазының аныяктар талазы-биле кол специализи Римма Күжүгет: «Бо чылын «Таарымчалыг хоорай хүрээлеңин хевирлээри» федералдыг программага Улуг-Хемден 9 төлевилел киржип турар. Бо хүнде ниитизи-биле 663 хамааты, оларның иштинден Шагаан-Арыг хоорайдан 486 кижи бадылаан. Сумулар аразындан Торгалыг суур мурнап турар — 66 кижи үнүн берген. Чурттакчы чон бадылаашкынга чүге эвээш киржип турарыл дээр болза, бирээде, улуг назылыг кижилер гаджеттер ажыглап билбезинде, ийиде, чурттакчы чоннуң идепкей чогунда. Чамдык улус «Госуслуги» парталда, электроннуг почтада бүрүткели чок азы чажыт сөзүн уттупкан, билбес болур. Ынчангаш ол ажылды чорудары-биле, волонтерларны хаара туткан бис. Олар хүннүң-не албан-организацияларже үнүп, чурттакчы чонга бадылаарынга дузалажып турарлар. Колдуунда-ла аныяктар, школачылар идепкейлиг соңгуп турар.
План езугаар 2244 кижи соңгаан турар, ам чүгле 600 ажыг кижи бо хүнде үнүн берген. Төлевилелдер аразында чурттакчы чонга таарымчалыг байдалды тургузар дыка эки үзел-бодалдар бар-дыр, чижээлээрге, Шагаан-Арыг хоорайда хүрээ чанынга Өг-бүле парыгын кылыры. Бо парк дээш шагаан-арыгжылар эң-не хөй соңгаан – 286 кижи үнүн берген. Келир үеде хоорай, сууруңар чаагайжыттынган, чараш болурун күзээр болзуңарза, онлайн-бадылаашкынга албан киржиңер. Бадылаашкын май 30-де доостур, ынчангаш чаңгыс чер-чурттугларымны идепкейлиг киржиринче кыйгырып тур мен».
Бо чылын кожуун-хоорайлар аразындан Улуг-Хем кожуун эң-не хөй – 9 төлевилелди киириштирип турар. Ол дээрге Шагаан-Арыг хоорайның төвүнге байырлалдар, улуг хемчеглер эрттирер шөл база хүрээ чанынга Өг-бүле парыгы, Арыг-Үзүү сумузунга Афган, Чечен дайыннарының маадырларынга тураскаал тудуу, хем эриинге уруглар дыштаныр болгаш ойнаар шөл, Торгалыг сумузунуң хем эриинге дыштаныр сесерликти кылыры, ол-ла сумунуң Кызыл-Туруг аржаанынче баар орукта арт кырын чаагайжыдары, Хайыраканның культура одааның мурнун чаагайжыдары, ол ышкаш Күскелдей кудумчузунга байырлалдар болгаш спортчу хемчеглер эрттирер шөлдү кылыры-дыр.
Чурттакчы чон бадылаашкынга идепкейлиг киришсин дээш, кожуунда аныяктар талазы-биле ажылдап турар специалистер Римма Күжүгет, Аян Хургул-оол бар-ла аргаларын тып, волонтерларны ол ажылга киириштирип турар. Оларның аразында эң-не идепкейлиг волонтер Айдыс Монгуш. Ол чадаг-тергези-биле албан черлерин кезип, улуг назылыг кижилерге тайылбыр ажылын чорудуп, «Госуслуги» сайт таварыштыр бадылаашкынга киириштирип турар.
Бадылаашкында мурнап турар Шагаан-Арыг хоорайга Өг-бүле парыгы азы Торгалыгга хем эриинге селгүүстеп дыштаныр сесерлик турзун дээр болза, тус черниң чурттакчыларының онлайн-бадылаашкынга идепкейлиг киржилгези херек. Ынчангаш бо арткан каш хонукта идепкейиңер көргүзүңер, улуг-хемчилер.
/ Алдынай АРАКЧАА.
Буян ООРЖАКТЫҢ тырттырган чуруктары.
