Чөөн-Хемчик кожууннуң Чадаана хоорайда Монгуш Мерген-Херел аттыг культура төвүнге Иелер хүнүнге тураскааткан кожуун чергелиг иелер чыыжы болган. Патриотчу темага тураскааткан чыышка барык-ла алды чүс ажыг кижи киришкен: тускай шериг операциязының киржикчилериниң авалары, кожууннуң алдарлыг иелери, идепкейлиг кырган-авалар, волонтёрлар, ТР-ниң Херээженнер эвилелиниң удуртукчулары, кожууннуң сумуларының херээженнер чөвүлелдериниң кежигүннери база ТР-ниң Дээди Хуралындан төлээлер.
Кожууннуң чагырга даргазы Айдыс Куулар биле кожууннуң баштыңы Инна Монгуш чыылганнарга байыр чедиргеш, ажыл-ишчи, мурнакчы аваларга база хоочуннарга юбилейлиг медальдарны тывыскан. Ол ышкаш кожуунда шылгараан иелерни хүндүлел бижиктер-биле шаңнап-мактаан.
Джамилья Монгуштуң баштаан иелер хору ырлажы бээрге, бүдүн залда чон туруп келген. Оолдарын чидирген авалар карактарының чажын чодуп, ыызы кээп турганнар.
Культура төвүнүң фойезинге Ада-чурттуң Улуг дайынының база ТШО-нуң киржикчилери маадырларның чуруктарын болгаш «алдын холдуг» аваларның кылган ажылдарын делгээн.
Чөөн-Хемчик кожууннуң он бир сумузунуң төлептиг херээжен чону ырак орук дивейн, сеткил-сагыжы-биле эки белеткелдиг, бедик көдүрлүүшкүннүг киришкеннер. Кожууннуң болгаш сумуларның херээженнер чөвүлелдери чону дээш, ажы-төлдүң келир үези дээш өг-бүлелер-биле сырый харылзаалыг, демниг ажылдап турары чоргааранчыг. 2022-2025 чылдарда кожууннуң, сумуларның чагыргалары, Херээженнер болгаш Адалар чөвүлелдери, сумуларның активчи чону шупту күжүн мөөңнеп, ТШО-да дайынчыларывыска херек чүүлдерни чыггаш, дузаламчыны чорудуп турарлар. Чүгле чыылда эвес, сумуларда маадырларның чырыткылыг адын мөңгежиткен тураскаалдарны тургузуп, янзы-бүрү хемчеглерни кожуун, сумулар бүдүн чыл дургузунда план ёзугаар организастап турар.
Ам бо хүннерде сумулар Чаа чыл уткуштур дайынчыларывыска улуг дузаламчыны белеткеп эгелей бергеннер. Тиилелге дээш кожууннуң сумулары улуг күштү мөөңнеп, каттыштырып турарлар. Залда чонну дайынчыларывыска Чаа чыл уткуштур чыылдага ам-даа идепкейлиг киржирин кыйгырган.
Кайгамчыктыг Тываның база бир ховар, каас-чараш чурумалдыг чери, олут орбас, чыдын чытпас, эрес-кежээ, ус-шевер, ажыл-ишчи, талантылыг, хүндүлээчел чоннуг Чадаана хоорайга Иелер хүнүнге тураскааткан чыышты бедик деңнелге эрттиргени өөрүнчүг.
/ Уран СОНАМ,
Тываның Херээженнер эвилелиниң Чөөн-Хемчикте куратору.
Чыраа-Бажы сумузу.
Авторнуң тырттырган чуруу.
“Шын” №48 2025 чылдың декабрь 11
