ТР-ниӊ лицензия бээр албаны база ТР-ниӊ ИХЯ-ныӊ ажылдакчылары эрткен неделяда демниг рейдини чоруткан. Алкогольдуг болгаш спирт холуксаалыг продукция садып-саарар талазы-биле хоойлужудулганы хажыткан 19 барымдааны илереткен. Хоойлуга дүүшпес саарылгадан 3065 штук азы 2 402, 2 литр арага-дары аймаан хавырган.
Республиканыӊ найысылалында дѳрт садыг арага-дары сатпас шакта ону садып-саарып турган. Оларныӊ ындыг чѳпшээрели база чок болган. Хоорайда бир дүнеки клуб назы четпээн кижиге пивону садыпкан. Оон аӊгыда, Кызылдыӊ бир складындан чогуур документизи чок алкогольдуг янзы-бүрү продукцияны чѳпшээрел чок шыгжап турар барымдаа илереттинген.
Тес-Хем биле Чѳѳн-Хемчик кожууннарда садыгларны хынап тургаш, 350 штук пиво болгаш ооӊ продукциязын хавырган. Сайгарлыкчылар ЕГАИС, тодаргайлаарга, этилдиг спирт, алкогольдуг болгаш спирт холуксаалыг продукцияны бүдүрер хемчээлин база садыг-саарылгазын учёттаар күрүнениӊ чаӊгыс аай информация системазында кирбейн турар барааннарны дажыглап сѳѳртүп турар болган.
Кызыл кожуунда бир садыг база арага-дары садар чѳпшээрел чок садып турган. Ол садыгдан 35 штук, 34,87 литр пивону болгаш пиво продукциязын хавырган.
Улуг-Хем кожууннуӊ Шагаан-Арыг хоорайда бир садыг база-ла чогуур документизи чок пиво аймаан шыгжап турган. Оон 144 штук, 130,8 литр пивону болгаш пиво продукциязын хавырган.
Тожу кожууннуӊ тѳвүнде ийи садыгда, Барыын-Хемчик кожууннуӊ Кызыл-Мажалыкта бир садыгда чогуур документизи чок алкогольдуг продукция бар болган, оларны база хавырган.
Хуу сайгарлыкчыларга хамаарыштыр РФ-тиӊ Административтиг эрге-хоойлу хажыдыышкыннарыныӊ дугайында кодекстиӊ 14.16 чүүлүнүӊ 2-ги кезээ-биле административтиг херектерни оттурган.
ТР-ниӊ лицензия бээр албанныӊ медээлеринден.
“Шын” №88 2024 чылдың ноябрь 16
