Регионнуң диспетчер албанының дыңнадыы-биле, август 30-де эртенгиниң 9 шактыы-биле алырга, Тываның арга-арыг фондузунуң 23829,5 га черде 32 өрт бүрүткеттинген. Оларның ийизин — Тожу биле Тес-Хем кожууннарда өрттерни узуткаан.
Кызыл, Тес-Хем, Тожу, Тере-Хөл, Таңды, Чеди-Хөл, Каа-Хем, Чөөн-Хемчик база Улуг-Хем кожууннарның девискээрлеринде өрттер кыппышаан. «Азас» заповедникте бир өрт илерээн.
Өрт өжүрер ажылдарда 537 кижи 80 техника хаара туттунган. Бойдус халавы-биле демиселде Тываның өртчүлери-биле катай Красноярск крайның, Новосибирск, Иркутск, Томск областарның, Хакас база Бурят республикаларның, ниитизи-биле 200 хире авиа арга-арыг камгалалының ажылдакчылары киржип турар. Таңды кожуунда Бе-200 самолет-амфибия база Ми-26 вертолет өрттер өжүрер ажылдарны чорудуп турар.
Август 30-де Тывада диңмирээшкин-кызаңнаашкыннаар, чер черлерге чаъстаар, соңгу-чөөн чүктен хаттың күжү секундада 15–20 м чедер. Чеди-Хөл, Кызыл, Эрзин, Каа-Хем, Чөөн-Хемчик база Улуг-Хем кожууннарда 4-кү класстың өрт айыылы чоруп турар.
ТР-ниң Чазааның медээлеринден.
«Шын» №66 2024 чылдың август 31