Бүгү чуртта Чаа чылдың «Күзелдер Шивизи» ачы-дуза акциязы уламчылап турар. Бо удаада Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышевтен белектерни Алтай Республикадан болгаш Новосибирск облазындан ийи уруг алган.
Новосибирск хоорайдан 12 харлыг Артём аас-кежиктиг уругларның бирээзи болган. Күрүне чөвүлелиниң хуралы эгелээр мурнунда бүрүн эргелиг төлээ Кремль ёлказындан оолдуң күзелин бижээн шарны тырттып алган. Элээди оол кикбоксингке ынак, бир дугаар спортчу чедиишкиннери бар, чажындан тура автомашиналар сонуургаар. Компьютерге амгы үениң оюнун ойнаар руль алыр күзели күүсеттинген: ол ам виртуалдыг делегейге машина мунарын шиңгээдип алыр.
Сибирьниң аңгы-аңгы регионнарындан база Донецк Улус Республикадан он беш уругнуң күзелдерин Анатолий Серышев акция езугаар боттандырган. Уругларның күзелдериниң аразында профессионал чүткүлден эгелээш, онзагай аян-чоруктарга чедир бар. Чижээ, циркти сцена артындан болгаш космодромну сонуургаары азы ГАИ инспекторунуң ролюн шенээри.
«Бо өөрүнчүг болуушкуннар оларның сактыышкыннарынга үр үеде артып каар база келир үеде мергежилин азы амыдыралче оруун безин хевирлээр дээрзинге бүзүрээр бис» — деп, Анатолий Серышев чугаалаан.
Россияның Президентизи Владимир Путин 2018 чылда «Күзелдер Шивизи» деп акцияны саналдап кииргенин сагындыраал. Ооң сорулгазы – амыдыралдың берге байдалынга таварышкан уругларның: инвалид, өскүс, чединмес өг-бүлелерден уругларның, ол ышкаш тускай шериг операциязының дайынчыларының өг-бүлелерден болгаш Донецк Улус Республикада, Луганск Улус Республикада база Запорожье биле Херсон областарда чурттап турар уругларның Чаа чылда күзелдерин боттандырар. Чеди чыл дургузунда төлевилел 320 муң ажыг уругларның күзелдерин күүсеткен.