Россияда өг-бүле айтырыынче кичээнгейни күштелдирип турарын билир бис. Чуртувустуң эң-не үнелиг эртинези өг-бүле болгай.
Эрткен неделяда бүгү делегейге Өг-бүле хүнүн демдеглээн. Өг-бүлениң ролюнуң ниитилелге чугулазын сактып, көргүзе- ри – байырлалдың кол утказы ол. Кижи өг-бүледен укталып, аңаа кижи болуп хевирлеттинер болгай. Чаш уруг ада-иезиниң, акы-угбазының, чоок кижилериниң аажы-чаңын дөзеп, чуртталгаже көрүжүн-даа, хамаарылгазын-даа оон уктап, өттүнер.
Дмитровтан келген интернационалчы өг-бүле база ол хүннү байырлаан. 39 харлыг Демир-оол Хертек биле 37 харлыг Елизавета Ортманның өг-бүлезинде бодунуң чаңчылдары, езулалдары бар.
Тыва оол биле орус омактыг кыстың дужуп, өг-бүле тударынга оларның эштери дузалаан. Демир-оол биле Елизавета барык бир чыл дургузунда социал четки таварыштыр харылзашкан. Демир-оол цирк-биле гастрольдарының дугайында, а Елизавета «Ажыл – бажың – ажыл» деп чаңгыс аайлашкак чуртталгазының дугайында бижижип турганнар.
Оларның өг-бүлези улуг мегаполис хоорайлардан бичии хоорайжыгаштарже болгаш суурларже көжүп, бичии казанактарга чурттап чорааннар. Барык алды чыл дургузунда көшкүн амыдырал үргүлчүлээн соонда, Демир-оол биле Елизавета Москва чоогунда Дмитров хоорайдан квартира садып алганнар.
Аал-оранындан ыракка чорааш-даа, аныяк өг-бүле чаагай чаңчылдарын утпайн чорааннар. Оларның өөнге тыва сүттүг шай, сүт, хойтпак, эъттен кылган амданныг аъш-чем кажан-даа үзүлбес. Елизаветаның чугаазы-биле алырга, Демир-оол аңаа дыка хөй тыва национал чемнер кылырын өөреткен, ынчалза-даа картофельдиг пирожки болгаш окрошкадан, «Оливье» деп салаттан Демир-оол кажанда-даа ойталавас.
Өг-бүлеге Данил биле Леня төрүттүнгенде, кандыг тоол номчуурунуң дугайында айтырыг тургустунмаан. Олар «Колобок», «Кызыл бөртчүгеш» база «Балыкчы Багай-оол» деп номнарны садып алганнар.
Цирк артизи ажылын дооскаш, Демир-оол мергежилин солаан. Демир-оол фото-чурук тырттырарынга хөлчок ынак. Ынчангаш куда-найыр тырттырар чагыглар хүлээп албышаан, өөнүң иштиниң блогер ажылынга дузалажып, видеороликтер тырттырып турар. Елизавета баштайгы дээрезинде өөнүң ээзиниң дугуйлар кырында цирк чуртталгазын көргүзүп турган болза, а амгы үеде тыва национал культураны, чаңчылдарны бодунуң блогунда таныштырып турар.
Аныяк өг-бүле аай-дедир көшпейн, чаңгыс черге турумчуур дээш, «дугуй кырында бажыңын» чоокта чаа садыпкан. Краснодар крайга чаа бажың тудар деп күзел төрүттүнген. Ажы-төл өзүп, квартирага сыңышпастаан. Елизавета ногаа-чимис тарыырын, а Демир-оол «дириг алдын» болур хойлар азыраарын планнап турарлар.
ТМГ-ниң медээлеринден.
«Шын» №37 2024 чылдың май 22
![](https://sun9-6.userapi.com/impg/dswLKERPXDHfR37cIk50aYVPeKGcAlmd4nJoPw/2Z1fs4aEefw.jpg?size=454x807&quality=95&sign=2b69d4530a0f16af965882baf22e98b2&c_uniq_tag=6z83--s8vZLfzagZHkViZMug4mh34M0cL8QFCmL6NiA&type=album)
![](https://sun9-71.userapi.com/impg/4ru4WNXYjooQmCbEOkK6ozDLbs29won8TY1BOg/xv3mN5-FxnY.jpg?size=750x742&quality=95&sign=eff2ba3f3211ff5b2e89470f62f939d1&c_uniq_tag=9p8xQP70qKKwJZBpYPpvyNT5lF2zsM2lkxxMNLpLfiY&type=album)
![](https://sun9-55.userapi.com/impg/AAHqlz-ObOhmD7xkcxMMm4p3C3Lpz9zi_ulDVw/zOt3hRZrFdY.jpg?size=750x749&quality=95&sign=403ef9e016113a0ec7ba740f8358dbdb&c_uniq_tag=16fQ6CBbCeij2ftCC67ddgG6buRDj5Za6eBBqUoUt6k&type=album)